തിരുവനന്തപുരം: സംസ്ഥാനത്തെ ഓൺലൈൻ സ്‌കൂൾ പഠനത്തിൽ വിവേചനം എന്നാരോപിച്ചുള്ള പ്രതിപക്ഷത്തിന്‍റെ അടിയന്തരപ്രമേയത്തിന് നിയമസഭയിൽ അനുമതി നിഷേധിച്ചു. റോജി എം.ജോൺ എം.എൽ.എയാണ് അടിയന്തര പ്രമേയത്തിന് നോട്ടീസ് നൽകിയത്. കേരളത്തിൽ ഏഴ് ലക്ഷത്തിലധികം കുട്ടികൾക്ക് ഓൺലൈൻ പഠനത്തിന് സൗകര്യം ഇല്ലെന്ന് വിവിധ ഏജൻസികൾ നടത്തിയ പഠനത്തിൽ വ്യക്തമായെന്ന് പ്രതിപക്ഷം ആരോപിച്ചു. വിദ്യാഭ്യാസം സൗജന്യം എന്ന് പറയുന്ന തത്വം അട്ടിമറിക്കപ്പെട്ടുവെന്ന് അടിയന്തര പ്രമേയത്തിന് അനുമതി തേടിക്കൊണ്ട് റോജി എം. ജോൺ പറഞ്ഞു.
അതേസമയം എല്ലാ വിദ്യാർത്ഥികൾക്കും ഓൺലൈൻ പഠന സൗകര്യം നൽകണമെന്ന് തന്നെയാണ് സർക്കാർ നയമെന്നും ഇക്കാര്യത്തിൽ എല്ലാവരുടെയും സഹകരണം ആവശ്യമാണെന്നും വിദ്യാഭ്യാസ മന്ത്രി വി.ശിവൻകുട്ടി അറിയിച്ചു. പ്രാഥമികമായി നടത്തിയ വിവര ശേഖരണത്തിൽ 49000 കുട്ടികൾക്കു മാത്രമാണ് നിലവിൽ ഓൺലൈൻ പഠനത്തിന് അസൗകര്യം ഉള്ളത് എന്നും അദ്ദേഹം വ്യക്തമാക്കി.