തിരുവനന്തപുരം:നിയമസഭ നേരത്തെ പിരിഞ്ഞതില്‍ പ്രതിഷേധമറിയിച്ച് പ്രതിപക്ഷം. ഇതുസംബന്ധിച്ച് പ്രതിപക്ഷ നേതാക്കള്‍ സ്‌പീക്കറെ നേരില്‍ കണ്ട് പ്രതിഷേധം അറിയിച്ചു. അടിയന്തര പ്രമേയ നോട്ടിസ് പരിഗണിക്കാതെ ശൂന്യവേള റദ്ദാക്കിയതിലുള്ള പ്രതിഷേധമാണ് സ്‌പീക്കറെ അറിയിച്ചത്.
നിയമസഭയില്‍ പ്രതിപക്ഷത്തിന്‍റെ അവകാശങ്ങള്‍ നിഷേധിക്കപ്പെട്ടത് അംഗീകരിക്കാനാകില്ല. പ്രതിപക്ഷാംഗങ്ങള്‍ സീറ്റില്‍ ഇരുന്നതിന് ശേഷവും എട്ട്‌ മിനിറ്റുകൊണ്ട് നടപടിക്രമങ്ങള്‍ പൂര്‍ത്തിയാക്കി സഭ പിരിഞ്ഞതിലുള്ള വിയോജിപ്പും നേതാക്കള്‍ വ്യക്തമാക്കിയിട്ടുണ്ട്. ചോദ്യോത്തരവേള തുടങ്ങിയപ്പോള്‍ തന്നെ പ്രതിപക്ഷം ഭരണഘടനാവിരുദ്ധ പരാമര്‍ശം നടത്തിയ മന്ത്രി സജി ചെറിയാനെതിരെ പ്രതിഷേധം ആരംഭിച്ചിരുന്നു.