നിശാഗന്ധിയില്‍ നൃത്തോത്സവത്തിന് തുടക്കം; മുഖ്യമന്ത്രി ഉദ്‌ഘാടനം ചെയ്‌തു

പ്രമുഖ ഭരതനാട്യം നർത്തകനും പത്മഭൂഷൻ ജേതാവുമായ പ്രൊഫ. സി.വി ചന്ദ്രശേഖറിന് നിശാഗന്ധി പുരസ്‌കാരം നൽകി ആദരിച്ചു

തിരുവനന്തപുരം:ഒരാഴ്‌ച നീണ്ട് നിൽക്കുന്ന നിശാഗന്ധി നൃത്തോത്സവത്തിന് കനകക്കുന്ന് നിശാഗന്ധി ഓഡിറ്റോറിയത്തിൽ തുടക്കമായി. സപ്‌ത ദീപങ്ങളിൽ തിരി തെളിച്ച് മുഖ്യമന്ത്രി പിണറായി വിജയൻ നൃത്തോത്സവം 2020-ന്‍റെ ഉദ്ഘാടനം നിര്‍വ്വഹിച്ചു. ആസ്വാദകരെ പുതിയ അനുഭൂതികളിലേക്ക് ഉയർത്തുന്ന നിശാഗന്ധി നൃത്തോത്സവം ലോക കലാ സാംസ്‌കാരിക, വിനോദ സഞ്ചാര ഭൂപടത്തിൽ ഇതിനോടകം ഇടം പിടിച്ചതായി മുഖ്യമന്ത്രി പറഞ്ഞു.

പ്രമുഖ ഭരതനാട്യം നർത്തകനും പത്മഭൂഷൻ ജേതാവുമായ പ്രൊഫ. സി വി ചന്ദ്രശേഖറിന് നിശാഗന്ധി പുരസ്‌കാരം നൽകി ആദരിച്ചു. ഒന്നര ലക്ഷം രൂപയും പ്രശസ്ഥി പത്രവും ശില്‍പവും അടങ്ങുന്നതാണ് പുരസ്‌കാരം. ടൂറിസം വകുപ്പിന്‍റെ നേതൃത്വത്തിൽ നടക്കുന്ന നൃത്തോത്സവത്തിൽ പ്രശസ്ഥരായ നിരവധി കലാകാരന്മാർ പങ്കെടുക്കും. പരിപാടി 26-ന് സമാപിക്കും.