തിരുവനന്തപുരം: മെഡിക്കൽ കോളജ് ആശുപത്രിയിലെ രോഗികളുടെയും കൂട്ടിരിപ്പുകാരുടെയും മൊബൈൽ ഫോണുകൾ മോഷ്‌ടിക്കുന്നയാൾ പിടിയിൽ. പള്ളിച്ചൽ സ്വദേശി ഹാജാ ഹുസൈൻ (22) ആണ് മെഡിക്കൽ കോളജ് പൊലീസിൻ്റെ പിടിയിലായത്. രോഗിയെപ്പോലെ കയ്യിൽ ബാൻഡേജ് വച്ചുകെട്ടിയും കൂട്ടിരിപ്പുകാരനെന്ന വ്യാജേനയും ആശുപത്രിക്കുള്ളിൽ കയറിയാണ് ഇയാൾ മോഷണം നടത്തിയിരുന്നതെന്ന് പൊലീസ് പറഞ്ഞു. വിവിധ പരാതികളുടെ അടിസ്ഥാനത്തിൽ പ്രത്യേക സംഘത്തെ നിയോഗിച്ചാണ് ഇയാളെ വലയിലാക്കിയതെന്ന് സിറ്റി പൊലീസ് കമ്മീഷണർ ബൽറാം കുമാർ ഉപാധ്യായ പറഞ്ഞു.