ന്യൂനപക്ഷ അനുപാതം : സർവകക്ഷിയോഗം വിളിച്ച് മുഖ്യമന്ത്രി

ഈ മാസം നാലിന് വൈകീട്ട് 3.30ന് വീഡിയോ കോൺഫറൻസിംഗ് വഴിയാണ് സർവകക്ഷിയോഗം.

തിരുവനന്തപുരം: സംസ്ഥാന ന്യൂനപക്ഷ ക്ഷേമ പദ്ധതി വിഷയത്തിൽ മുഖ്യമന്ത്രി പിണറായി വിജയൻ സർവകക്ഷിയോഗം വിളിച്ചു. ഈ മാസം നാലിന് വൈകീട്ട് 3.30ന് വീഡിയോ കോൺഫറൻസിംഗ് വഴിയാണ് യോഗം. ന്യൂനപക്ഷ വിഭാഗങ്ങളുടെ ക്ഷേമ പദ്ധതി വിതരണത്തിലെ അനുപാതം സംബന്ധിച്ച ഹൈക്കോടതി വിധിയുടെ പശ്ചാത്തലത്തിലാണിത്. ന്യൂനപക്ഷ സംവരണത്തിനുള്ള അനുപാതത്തിലാണ് ഹൈക്കോടതി ഭേദഗതി ആവശ്യപ്പെട്ടത്.

80 ശതമാനം മുസ്ലിങ്ങള്‍ക്കും 20 ശതമാനം ഇതര ന്യൂനപക്ഷ വിഭാഗങ്ങള്‍ക്കും എന്ന അനുപാതത്തിലായിരുന്നു ഇതുവരെ ന്യൂനപക്ഷ ക്ഷേമ പദ്ധതികൾ മുന്നോട്ടുപോയിരുന്നത്. ഈ അനുപാതമാണ് ഹൈക്കോടതി റദ്ദാക്കിയത്. ഇപ്പോഴത്തെ ജനസംഖ്യ അനുസരിച്ച് ഈ അനുപാതം പുനർ നിശ്ചയിക്കണമെന്ന് ഹൈക്കോടതി വ്യക്തമാക്കിയിരുന്നു.