കോളജ് വിദ്യാര്‍ഥിനിയെ ആക്രമിച്ച സംഭവത്തില്‍ കടുത്ത നടപടിയെന്ന് മന്ത്രി വി.എന്‍ വാസവന്‍

കോട്ടയം നഗരത്തില്‍ ഇന്നലെ രാത്രി കോളജ് വിദ്യാര്‍ഥിനിക്ക് നേരെയുണ്ടായ ആക്രമണത്തില്‍ പ്രതികരണവുമായി മന്ത്രി വി.എന്‍ വാസവന്‍

തിരുവനന്തപുരം:കോട്ടയം നഗരത്തിൽ കോളജ് വിദ്യാർഥിനിക്കും സുഹൃത്തിനും നേരെയുണ്ടായ ആക്രമണം ഹീനമായ നടപടിയെന്ന് മന്ത്രി വി.എൻ വാസവൻ. ഒരിക്കലും സംഭവിക്കാൻ പാടില്ലാത്തതാണ് കോട്ടയത്ത് നടന്നത്. വിഷയത്തില്‍ പൊലീസ് കർശനമായ നടപടി സ്വീകരിച്ചിട്ടുണ്ട്.

ഇക്കാര്യത്തിൽ സർക്കാർ പ്രത്യേക നിർദേശം നൽകിയതായും മന്ത്രി പറഞ്ഞു. ഇത്തരം സംഭവങ്ങൾ ആവർത്തിക്കാതിരിക്കാനുള്ള നടപടികൾ സ്വീകരിക്കുമെന്നും മന്ത്രി വ്യക്തമാക്കി. ഇന്നലെ രാത്രി പത്തരയോടെയാണ് മൂന്നംഗ സംഘം വിദ്യാർഥിനിയേയും സുഹൃത്തിനെയും സെൻട്രൽ ജങ്ഷന് സമീപം വച്ച് ആക്രമിച്ചത്.

പെണ്‍കുട്ടിയോട് മോശമായി സംസാരിച്ചത് ചോദ്യം ചെയ്‌തതിനെ തുടർന്നായിരുന്നു അക്രമം. കോളജ് വിദ്യാർഥിനിയെയും സുഹൃത്തിനെയും ആക്രമിക്കുന്ന ദൃശ്യങ്ങൾ പുറത്തു വന്നതിനെ തുടര്‍ന്ന് താഴത്തങ്ങാടി സ്വദേശികളായ മൂന്നു യുവാക്കളെ ഇന്നലെ രാത്രി തന്നെ പൊലീസ് അറസ്റ്റ് ചെയ്‌തിരുന്നു.