തിരുവനന്തപുരം: വനിത ഡോക്‌ടർക്ക് അനുഭവ പരിചയം കുറവാണെന്നും പൊലീസുകാർ കൊണ്ടുവന്ന പ്രതിയെ കണ്ട് ഭയന്ന് പോയതാകാമെന്നുമുള്ള വിവാദ പരാമർശവുമായി ആരോഗ്യ മന്ത്രി വീണ ജോർജ്. കൊട്ടാരക്കരയിൽ ഡോക്‌ടറെ കുത്തിക്കൊന്ന സംഭവത്തിൽ പ്രതികരിക്കുകയായിരുന്നു മന്ത്രി വീണ ജോർജ്. മന്ത്രിയുടെ പ്രസ്‌താവനക്കെതിരെ വിമർശനങ്ങൾ ഉയർന്നു.
ആരോഗ്യ പ്രവര്‍ത്തകര്‍ക്കെതിരായ അതിക്രമത്തിനെതിരെ നിയമം ശക്തമാക്കുമെന്നും അതിക്രമം തടയാന്‍ ഓര്‍ഡിനന്‍സ് ഇറക്കുമെന്നും മന്ത്രി വീണ ജോര്‍ജ് മാധ്യമപ്രവർത്തകരോട് പറഞ്ഞു. ആരോഗ്യവകുപ്പിലെ ഉദ്യോഗസ്ഥരുമായി സംസാരിച്ചിരുന്നു. വളരെ ദാരുണമായിട്ടുള്ള നിര്‍ഭാഗ്യകരമായ സംഭവമാണ്. വളരെ വേദനിപ്പിക്കുന്ന രീതിയിലാണ് ഡോക്‌ടർ കൊല്ലപ്പെട്ടിരിക്കുന്നതെന്നും മന്ത്രി പറഞ്ഞു.