തിരുവനന്തപുരം: മന്ത്രി കെടി ജലീലിന്‍റെ ബന്ധു കെടി അദീബിന് ന്യൂനപക്ഷ വികസന ധനകാര്യ കോർപ്പറേഷനില്‍ നിയമനം നല്‍കിയത് മുഖ്യമന്ത്രിയുടെ അറിവോടെയെന്ന് വ്യക്തമാക്കുന്ന തെളിവുകൾ പുറത്ത്. നിയമന യോഗ്യതയിൽ ഇളവ് നൽകാനുള്ള മന്ത്രിസഭ തീരുമാനത്തിൽ മുഖ്യമന്ത്രിയും ഒപ്പിട്ടിരുന്നു എന്ന് വ്യക്തമാക്കുന്ന രേഖയാണ് പുറത്തുവന്നത്. 2016 ഓഗസ്റ്റ് ഒമ്പതിനാണ് മുഖ്യമന്ത്രി ഈ ഫയലിൽ ഒപ്പിട്ടത്.
ന്യൂനപക്ഷ വികസന ധനകാര്യ കോർപ്പറേഷനിൽ ജനറൽ മാനേജറെ നിയമിക്കുന്നതിന് നേരത്തെ അഭിമുഖത്തിന് ക്ഷണിച്ചിരുന്നു. ഈ അഭിമുഖത്തിൽ അദീബ് പങ്കെടുത്തിരുന്നില്ല. പിന്നീട് ഈ തസ്തികയിൽ പുതിയ യോഗ്യത നിശ്ചയിക്കുകയായിരുന്നു. നിയമനത്തിനുള്ള യോഗ്യതയിൽ മാറ്റം വരുത്തണമെന്ന് ആവശ്യപ്പെട്ട് മന്ത്രി കെ ടി ജലീൽ പൊതുഭരണ സെക്രട്ടറിക്ക് നൽകിയ കത്ത് കഴിഞ്ഞ ദിവസം പുറത്തായിരുന്നു. ഇതിനുപിന്നാലെയാണ് മുഖ്യമന്ത്രിയും ഫയൽ കണ്ടുവെന്ന് വ്യക്തമാക്കുന്ന രേഖകൾ വെളിപ്പെട്ടിരിക്കുന്നത്. തസ്തിക നിർണയം വിദ്യാഭ്യാസ യോഗ്യത അനുസരിച്ച് ധനകാര്യവകുപ്പിന്‍റെ അഭിപ്രായത്തോടുകൂടി മന്ത്രിസഭായോഗ തീരുമാനപ്രകാരമാണെന്നാണ് രേഖകൾ വ്യക്തമാക്കുന്നത്. മന്ത്രിസഭായോഗ തീരുമാനം മുഖ്യമന്ത്രി ഒപ്പിടാതെ നടപ്പാവില്ല എന്നതാണ് നിയമനം മുഖ്യമന്ത്രി അറിഞ്ഞിരുന്നു എന്നതിന്‍റെ വ്യക്തമായ തെളിവ്.