തിരുവനന്തപുരം :അട്ടപ്പാടിയില്‍ ആദിവാസി ദമ്പതികള്‍ക്കെതിരെ വെടിയുതിര്‍ത്ത സംഭവത്തില്‍ റിപ്പോര്‍ട്ട് തേടി പട്ടിക ജാതി-പട്ടിക വര്‍ഗ വകുപ്പ് മന്ത്രി കെ. രാധാകൃഷ്‌ണൻ. സംഭവത്തില്‍ വിശദമായ അന്വേഷണ റിപ്പോര്‍ട്ട് അടിയന്തരമായി നല്‍കാന്‍ പട്ടിക വര്‍ഗ വികസന വകുപ്പ് ഡയറക്‌ടറോട് മന്ത്രി നിര്‍ദേശിച്ചു.
പട്ടിക വര്‍ഗ വിഭാഗങ്ങള്‍ക്കെതിരെയുള്ള ഇത്തരം അതിക്രമങ്ങള്‍ തടയാന്‍ മാതൃകാപരമായ ശിക്ഷാനടപടി ഉറപ്പാക്കുമെന്നും മന്ത്രിയുടെ ഓഫിസ് അറിയിച്ചു.
താഴെ മഞ്ചിക്കണ്ടി പഴംതോട്ടില്‍ അയല്‍വാസിക്കുനേരെ എയര്‍ഗണ്‍ ഉപയോഗിച്ച് വെടിയുതിര്‍ത്ത മഞ്ചിക്കണ്ടി സ്വദേശി ഈശ്വരന്‍ (60) ഇന്ന് (ചൊവ്വ) അറസ്റ്റിലായിരുന്നു. തനിക്കുനേരെ മൂന്നുതവണ നിറയൊഴിച്ചെന്നാണ് അയല്‍വാസി ചെല്ലിയുടെ പരാതി. എന്നാല്‍ കൊള്ളാതിരുന്നതിനാല്‍ അപകടം ഒഴിവായി.
READ MORE:അയൽവാസിക്കുനേരെ എയർ ഗൺ കൊണ്ട് വെടിയുതിര്‍ത്തയാള്‍ അറസ്റ്റിൽ
തന്‍റെ സ്ഥലത്തേക്ക് ചെല്ലിയുടെ കന്നുകാലികൾ കയറുന്നതിനെ ചൊല്ലിയുള്ള തർക്കത്തിനിടെയാണ് ഈശ്വരൻ കയ്യിലുള്ള എയർ ഗൺ ഉപയോഗിച്ച് വെടിയുതിര്‍ത്ത് ഭീഷണിപ്പെടുത്തിയത്.
