'തരൂർ എഫക്‌ടോ?'; പ്രതിപക്ഷ നേതാവിന്‍റെ പ്രസംഗം തടസപ്പെടുത്തിയത് തരൂർ അനുകൂലികളാണോ എന്ന പരിഹാസവുമായി മന്ത്രി എംബി രാജേഷ്

കോര്‍പ്പറേഷനിലെ കത്ത് വിവാദത്തില്‍ പ്രതിപക്ഷ നേതാവിന്‍റെ വാക്കൗട്ട് പ്രസംഗം തടസപ്പെടുത്തി നടുത്തളത്തിലിറങ്ങി മുദ്രാവാക്യം വിളിച്ച പ്രതിപക്ഷയംഗങ്ങളുടെ നടപടി കോൺഗ്രസിലെ തരൂർ അനുകൂലികളാണോ എന്ന് സംശയിക്കുന്നുവെന്ന പരിഹാസവുമായി മന്ത്രി എംബി രാജേഷ്

തിരുവനന്തപുരം: കോര്‍പ്പറേഷനിലെ കത്ത് വിവാദത്തില്‍ പ്രതിപക്ഷ നേതാവിനെ പരിഹസിച്ച് തദ്ദേശ സ്വയംഭരണ വകുപ്പ് മന്ത്രി എംബി രാജേഷ്. പ്രതിപക്ഷ നേതാവിന്‍റെ വാക്കൗട്ട് പ്രസംഗം തടസപ്പെടുത്തി നടുത്തളത്തിലിറങ്ങി മുദ്രാവാക്യം വിളിച്ച പ്രതിപക്ഷയംഗങ്ങളുടെ നടപടിയേയാണ് മന്ത്രി പരിഹസിച്ചത്. വസ്‌തുതകൾ നിരത്തിയാണ് സർക്കാർ പ്രതിപക്ഷത്തിന്‍റെ അടിയന്തര പ്രമേയത്തിന് മറുപടി നൽകിയതെങ്കിലും പ്രതിപക്ഷം ബഹളം ഉണ്ടാക്കുകയാണുണ്ടായത്.

കോൺഗ്രസിലെ തരൂർ അനുകൂലികളാണോ പ്രതിപക്ഷ നേതാവിന്‍റെ പ്രസംഗം തടസപ്പെടുത്തിയത് എന്ന് സംശയിക്കുന്നു. ഭരണപക്ഷം തന്നെ പ്രതിപക്ഷ നേതാവിനെ സംരക്ഷിക്കണമെന്ന ആവശ്യം ഉന്നയിച്ചിട്ടുണ്ട്. സർക്കാറിന്‍റെ നിലപാടുകൾക്ക് മറുപടിയില്ലാത്തതിനാൽ നിസഹായതയോടെ പ്രതിപക്ഷ നേതാവ് ഇത് അംഗീകരിക്കുകയായിരുന്നുവെന്നും മന്ത്രി പറഞ്ഞു.

തിരുവനന്തപുരം കോർപ്പറേഷനിലെ നിയമന വിവാദത്തിലെ കത്ത് വ്യാജമാണെന്നാണ് മേയർ പരാതി നൽകിയിരിക്കുന്നത്. ഇതിന്‍റെ അടിസ്ഥാനത്തിലാണ് വ്യാജ കത്തെന്ന് സഭയിൽ പറഞ്ഞത്. വിവാദമായ നിയമനത്തിൽ രണ്ടുതവണ പത്രപരസ്യം നൽകിയിട്ടുണ്ടെന്നും മുൻവാതിൽ തുറന്നിട്ടിട്ടും നിയമനത്തിന് ആളെ കിട്ടാത്തിടത്താണ് പിൻവാതിൽ നിയമനമെന്ന് പറയുന്നതെന്നും മന്ത്രി അറിയിച്ചു.

രാഷ്‌ട്രീയ ആരോപണം മാത്രമാണ് പ്രതിപക്ഷം ഉന്നയിക്കുന്നത്. നിയമസഭയിൽ ഉന്നയിച്ച യുഡിഎഫ് കാലത്തെ ശുപാർശ കത്തുകൾ മേശപ്പുറത്ത് വയ്ക്കണമെന്ന അഭിപ്രായം പ്രതിപക്ഷ നേതാവിന് പറയാൻ കഴിയുമോയെന്ന് എംബി രോജേഷ് വെല്ലുവിളിച്ചു.