കെഎസ്ആർടിസി എംപാനൽ കൂട്ടായ്മയുടെ സമരത്തെ അവഗണിച്ച് സർക്കാർ. ഗതാഗതമന്ത്രി തിരുവനന്തപുരത്ത് എത്തിയാലുടൻ സമരക്കാരുമായി ചർച്ച നടത്തുമെന്ന് എൽഡിഎഫ് കൺവീനർ എ വിജയരാഘവൻ നൽകിയ ഉറപ്പ് മന്ത്രി ലംഘിച്ചു. ഇതോടെ എം പാനൽ കൂട്ടായ്മ സമരം ശക്തമാക്കിയിരിക്കുകയാണ്.
എൽഡിഎഫിന്‍റെ ജാഥയിൽ പങ്കെടുത്തുകൊണ്ടിരിക്കുന്ന മന്ത്രി എകെ ശശീന്ദ്രൻ തിരുവനന്തപുരത്ത് എത്തിയാലുടൻ എംപാനൽ കൂട്ടായ്മയുമായി ചർച്ച നടത്തുമെന്നായിരുന്നു എൽഡിഎഫ് കൺവീനറുടെ ഉറപ്പ്. എന്നാൽ സർക്കാരിന്‍റെ ആയിരം ദിനാഘോഷങ്ങളിൽ പങ്കെടുക്കാൻ ഇന്ന്തലസ്ഥാനത്തെത്തിയ മന്ത്രി സമരക്കാരെ കാണാനോ ചർച്ച നടത്താനോ തയ്യാറായില്ല. ഈ പശ്ചാത്തലത്തിലാണ് സർക്കാരിന്‍റെ അവഗണനക്കെതിരെ എംപാനൽ കൂട്ടായ്മ മുഖ്യമന്ത്രിയുടെ വസതിയിലേക്ക് വിലാപയാത്ര നടത്തിയത്. പിണറായി സർക്കാർ തൊഴിലാളിവിരുദ്ധ സർക്കാരാണെന്ന് എംപാനൽ കൂട്ടായ്മ ആരോപിച്ചു. തെരഞ്ഞെടുപ്പ് പ്രഖ്യാപനത്തിന് മുൻപ് സമരം ഒത്തുതീർപ്പാക്കിയില്ലെങ്കിൽ തെരഞ്ഞെടുപ്പിൽ സർക്കാരിനെതിരെ പ്രചാരണം നടത്തുമെന്നും എംപാനൽ കൂട്ടായ്മ വ്യക്തമാക്കി.
