തിരുവനന്തപുരം:കെ.എസ്.ആര്‍.ടി.സി ജീവനക്കാരുടെ ശമ്പള പരിഷ്‌കരണവുമായി ബന്ധപ്പെട്ട് ആശങ്ക വേണ്ടെന്ന് ഗതാഗതമന്ത്രി ആന്‍റണി രാജു. തര്‍ക്കങ്ങള്‍ നിലനില്‍ക്കുന്നത് ചെറിയ കാര്യങ്ങളില്‍ മാത്രമാണ്. തര്‍ക്കവിഷയത്തില്‍ ജനുവരി മൂന്നിന് വീണ്ടും ചര്‍ച്ചകള്‍ നടത്താനാണ് നിലവില്‍ തീരുമാനിച്ചതെന്നും അദ്ദേഹം പറഞ്ഞു.
അതേസമയം ശമ്പളക്കരാര്‍ ഈ മാസം ഒപ്പിട്ടില്ലെങ്കില്‍ അനിശ്ചിതകാല പണിമുടക്കിലേക്ക് കടക്കാനാണ് കെ.എസ്.ആര്‍.ടി.സി തൊഴിലാളി യൂണിയനുകളുടെ തീരുമാനം. ശമ്പളക്കരാര്‍ ഈ മാസം ഒപ്പിട്ടില്ലെങ്കില്‍ അനിശ്ചിതകാല പണിമുടക്കിലേക്ക് കടക്കാനും ജനുവരിയിലെ മന്ത്രിതല ചര്‍ച്ച ബഹിഷ്‌ക്കരിക്കാനുമാണ് കെ.എസ്.ആര്‍.ടി.സി തൊഴിലാളി യൂണിയനുകളുടെ തീരുമാനം.
'ശമ്പള പരിഷ്‌കരണത്തില്‍ ആശങ്ക വേണ്ട'
സര്‍ക്കാര്‍ വാക്കുപാലിക്കാന്‍ തയ്യാറാകണമെന്നും ഉദ്യോഗസ്ഥര്‍ ഭരണത്തില്‍ കൈകടത്തുന്നത് തടയണമെന്നും ഇവര്‍ ആവശ്യപ്പെടുന്നു. നീണ്ട ചര്‍ച്ചകള്‍ക്ക് ശേഷം ഈ മാസം ഒമ്പതിന് ഗതാഗത മന്ത്രിയുമായി നടത്തിയ അവസാനവട്ട ചര്‍ച്ചയിലാണ് ശമ്പള പരിഷ്‌ക്കരണത്തിന് അനുമതിയായത്. ജനുവരി മാസം മുതല്‍ പ്രാബല്യത്തില്‍ വരുമെന്ന ഉറപ്പും നല്‍കി.
എന്നാല്‍ കഴിഞ്ഞ ദിവസം കെ.എസ്.ആര്‍.ടി.സി സി.എം.ഡി വിളിച്ച ചര്‍ച്ചയില്‍ കരാര്‍ ഒപ്പിടുന്നതിനു മുന്‍പ് തുടര്‍ ചര്‍ച്ചകള്‍ വേണമെന്നാണ് അറിയിച്ചത്. വ്യവസ്ഥകളെല്ലാം പറഞ്ഞുറപ്പിച്ചിട്ട് ഇനിയെന്ത് ചര്‍ച്ചയെന്നാണ് യൂണിയനുകളുടെ ചോദ്യം. കെ.എസ്.ആര്‍.ടി.സി ജീവനക്കാരുടെ ശമ്പള പരിഷ്‌കരണവുമായി ബന്ധപ്പെട്ട് ആശങ്ക വേണ്ടെന്നാണ് ഗതാഗതമന്ത്രി ആന്‍റണി രാജു പറയുന്നത്.