തിരുവനന്തപുരം : ലോക്‌സഭ തെരഞ്ഞെടുപ്പില്‍ ഭരണപ്രതീക്ഷയോടെ ചുവടുവയ്‌ക്കാനൊരുങ്ങുന്ന ഇന്ത്യ സഖ്യത്തിന് (INDIA Alliance) കേരളത്തില്‍ നിന്ന് പരമാവധി അംഗങ്ങളെ എത്തിക്കാനുള്ള ശ്രമങ്ങള്‍ക്ക് പിന്തുണയുമായി കെപിസിസി നേതൃയോഗങ്ങള്‍ (KPCC Leadership Meeting) നാളെ (ഒക്‌ടോബര്‍ 4) തുടങ്ങും. രാഷ്ട്രീയകാര്യ സമിതി യോഗത്തോടെയാണ് നേതൃയോഗങ്ങള്‍ ആരംഭിക്കുന്നത്. അടിത്തട്ടില്‍ പിടികൂടിയിരിക്കുന്ന ഗുരുതരമായ സംഘടന പ്രശ്‌നങ്ങളുടെ കുരുക്കഴിക്കാനുള്ള ചര്‍ച്ചകളാകും നാളത്തെ രാഷ്ട്രീയ കാര്യ സമിതിയോഗത്തില്‍ പ്രധാനമായും ഉയരുക.
തെരഞ്ഞെടുപ്പിന് മുന്നോടിയായി കേന്ദ്ര-സംസ്ഥാന സര്‍ക്കാരുകളുടെ ദുര്‍ഭരണത്തിനെതിരായ സന്ദേശങ്ങള്‍ പ്രചരിപ്പിക്കാനായുള്ള ഭവന സന്ദര്‍ശനം, കോണ്‍ഗ്രസ് സര്‍ക്കാരുകള്‍ കൊണ്ടുവന്ന ക്ഷേമ പ്രവര്‍ത്തനങ്ങള്‍ പേരുമാറ്റി മോദി സര്‍ക്കാര്‍ സ്വന്തം പരിപാടിയായി അവതരിപ്പിക്കുന്നതിന്‍റെ പൊള്ളത്തരങ്ങള്‍ എന്നിവ ജനങ്ങള്‍ക്കിടയില്‍ തുറന്നുകാട്ടുന്നതിന് വേണ്ടിയുള്ള പരിപാടികള്‍ക്കാകും രാഷ്ട്രീയ കാര്യ സമിതി യോഗം പ്രധാനമായും രൂപം നല്‍കുക. കൂടാതെ, ബൂത്ത് തലം മുതല്‍ തന്നെ പാര്‍ട്ടിയെ ഊര്‍ജസ്വലമാക്കുന്നതിനൊപ്പം വോട്ടര്‍പട്ടികയില്‍ പേര് ചേര്‍ക്കല്‍ തുടങ്ങിയ പ്രവര്‍ത്തനങ്ങള്‍ എങ്ങനെ വേണമെന്നുള്ള തീരുമാനവും യോഗത്തില്‍ സ്വീകരിക്കും.
കോണ്‍ഗ്രസ് മണ്ഡലം പ്രസിഡന്‍റുമാരുടെ പുനഃസംഘടന വേഗത്തില്‍ പൂര്‍ത്തീകരിക്കുന്നതിനായുള്ള പിന്തുണ യോഗത്തില്‍ കെപിസിസി പ്രസിഡന്‍റ് അഭ്യര്‍ഥിക്കും. കൂടാതെ, ലോക്‌സഭ തെരഞ്ഞെടുപ്പ് നടക്കാനിടയുള്ള മാര്‍ച്ച് - ഏപ്രില്‍ മാസം വരെ നീളുന്ന സമര - പ്രചാരണ പരിപാടികളുടെ കൃത്യമായ ടൈംടേബിളും യോഗത്തിലുണ്ടാകും. ടൈംംബിളില്‍ നിര്‍ദേശിക്കുന്ന കാര്യങ്ങളുടെ പുരോഗതി വിലയിരുത്താനുള്ള പ്രത്യേക സമിതിയും രൂപീകരിക്കും.
ഇന്ത്യ സഖ്യത്തിന്‍റെ ഏകോപന സമിതിയില്‍ പ്രതിനിധികളെ ഉള്‍പ്പെടുത്താത്ത സിപിഎം ദേശീയ തലത്തില്‍ ബിജെപിയെ സഹായിക്കുന്ന സമീപനമാണ് സ്വീകരിക്കുന്നത് എന്ന വാദമാകും കോണ്‍ഗ്രസ് കേരളത്തില്‍ ഉന്നയിക്കുക. ഇക്കാര്യം ചൂണ്ടിക്കാട്ടി കേരളത്തില്‍ സിപിഎമ്മിനെ നേരിടാനുള്ള തന്ത്രങ്ങള്‍ക്കായിരിക്കും കോണ്‍ഗ്രസ് രൂപം നല്‍കുന്നത്.
രാഷ്ട്രീയകാര്യസമിതി യോഗം എടുക്കുന്ന നയപരമായ കാര്യങ്ങള്‍ക്ക് അംഗീകാരം നല്‍കാന്‍ അഞ്ചാം തീയതി കെപിസിസി ഭാരവാഹികളുടെയും ഡിസിസി പ്രസിഡന്‍റുമാരുടെയും യോഗം ചേരും. സഹകരണ മേഖലയിലെ പ്രശ്‌നങ്ങള്‍ ചര്‍ച്ച ചെയ്യാനും സമര പരിപാടികള്‍ക്ക് രൂപം നല്‍കാനും അടുത്ത ദിവസം സഹകാരികളുടെ യോഗം യുഡിഎഫ് വിളിച്ചിട്ടുണ്ട്.
പുതുപ്പള്ളി തെരഞ്ഞെടുപ്പ് വിജയത്തിന്‍റെ ശോഭകെടുത്തുന്ന നടപടിയായിപ്പോയി വാര്‍ത്താസമ്മേളനത്തര്‍ക്കമെന്നും പാര്‍ലമെന്‍ററി പാര്‍ട്ടി നേതാവും പ്രസിഡന്‍റും രണ്ട് തട്ടിലാണെന്ന സന്ദേശം അണികളിലേക്ക് എത്തുന്നത് തെരഞ്ഞെടുപ്പില്‍ ദോഷം ചെയ്യുമെന്നും വാദങ്ങളുയരാം. ഇരുവരും ഒറ്റക്കെട്ടാണെന്ന സന്ദേശം നല്‍കുന്ന നടപടികള്‍ ഉടന്‍ ഉണ്ടാകണമെന്നും യോഗത്തില്‍ ആവശ്യമുയരും.
രാഷ്ട്രീയകാര്യസമിതി പുനഃസംഘടിപ്പിക്കും:രാഷ്ട്രീയകാര്യസമിതി അംഗങ്ങളുടെ എണ്ണം കൂട്ടി ഉടച്ചുവാര്‍ക്കണമെന്ന ചിന്ത കോണ്‍ഗ്രസില്‍ ശക്തമാണ്. നിലവിലെ 21 അംഗ സമിതി 30 ആക്കി ഉയര്‍ത്തുക എന്ന പൊതുധാരണയില്‍ നേതാക്കള്‍ എത്തിയെന്നാണ് സൂചന. നിലവില്‍ 16 അംഗങ്ങള്‍ മാത്രമാണ് രാഷ്ട്രീയകാര്യ സമിതിയില്‍ ഉള്ളത്.