തിരുവനന്തപുരം: നെഹ്റു യുവകേന്ദ്രയുടെ മികച്ച യുവജന സാമൂഹിക സാംസ്‌കാരിക സന്നദ്ധ സംഘടനക്കുള്ള പുരസ്‌കാരം വെള്ളറട കിളിയൂർ സാഗര ഗ്രന്ഥശാല ആന്‍റ് കലാകായിക സാംസ്‌കാരിക വേദിക്ക്. കേന്ദ്ര യുവജനക്ഷേമ കായിക മന്ത്രാലയമാണ് പുരസ്‌കാരം നല്‍കുന്നത്. 2018-19 വർഷത്തെ മികച്ച പ്രവർത്തനം വിലയിരുത്തിയാണ് പുരസ്‌കാരം.
പുത്തൻ ആശയങ്ങളിലൂടെ മാതൃകാപരമായി നടത്തിയ പ്രവർത്തനങ്ങളാണ് മലയോര മേഖലയായ വെള്ളറടയിലെ സാഗര ഗ്രന്ഥശാലയെ ജില്ലയിലെ മികച്ച യൂത്ത് ക്ലബിനുള്ള പുരസ്‌കാരത്തിന് അർഹമാക്കിയത്. 25,000 രൂപയും പ്രശസ്‌തിപത്രവും ഫലകവും അടങ്ങുന്നതാണ് പുരസ്ക്കാരം.
മികച്ച പരിസ്ഥിതിസംരക്ഷണ പ്രവർത്തനങ്ങൾ, യുവാക്കളിലെ കായിക- മാനസിക- വിദ്യാഭ്യാസ ഉന്നമനത്തിനായി നടത്തിയ പ്രവർത്തനങ്ങൾ, ലഹരിക്കെതിരായ ബോധവല്‍ക്കരണ പ്രവർത്തനങ്ങൾ, ആരോഗ്യ സംരക്ഷണ ബോധവല്‍ക്കരണ പ്രവർത്തനങ്ങൾ, കലാമേളകൾ, മെഡിക്കൽ ക്യാമ്പുകൾ, രക്തദാന പ്രവർത്തനങ്ങൾ, പ്രളയകാലത്തെ ദുരിതാശ്വാസ പ്രവർത്തനങ്ങൾ, ദേശീയ-അന്തർദേശീയ ദിനാചരണങ്ങൾ, യുവജനങ്ങൾക്കായി തൊഴിൽ പരിശീലന പരിപാടികൾ, വ്യക്തിത്വ വികസന ക്ലാസുകൾ, കരിയർ ഗൈഡൻസ് ക്ലാസുകൾ, കാർഷിക മേഖലയുടെ ഉന്നമനത്തിനായി നടത്തിയ പ്രവർത്തനങ്ങൾ, പൊതുസ്ഥല ശുചീകരണ പ്രവർത്തനങ്ങൾ തുടങ്ങിയവ മലയോര മേഖലയിലെ കലാകായിക സാംസ്‌കാരിക പ്രവർത്തനങ്ങൾക്ക് മുതൽകൂട്ടായി.