മുല്ലപ്പെരിയാർ വിഷയം; തമിഴ്‌നാടിനെതിരായ തുടര്‍ നടപടി ഇന്നത്തെ മന്ത്രിസഭ യോഗത്തില്‍

kerala cabinet meeting: വെള്ളം തുറന്നുവിടുന്നതിനു മുമ്പ് മുന്നറിയിപ്പ് നല്‍കണമെന്ന് തമിഴ്‌നാടിന് മുഖ്യമന്ത്രി പിണറായി വിജയൻ കത്തയച്ചിരുന്നു. എന്നാല്‍ അതിനുശേഷവും രാത്രിയില്‍ വെള്ളം തുറന്ന് വിടുന്നത് തമിഴ്‌നാട് ആവര്‍ത്തിച്ചതിന്‍റെ പശ്ചാത്തലത്തിലാണ് തുടര്‍നടപടി ചര്‍ച്ചയാവുന്നത്.

തിരുവനന്തപുരം: മുല്ലപ്പെരിയാറില്‍ മുന്നറിയിപ്പില്ലാതെ വെള്ളം തുറന്നു വിടുന്ന തമിഴ്‌നാടിന്‍റെ പ്രവര്‍ത്തിയില്‍ തുടര്‍ നടപടി ഇന്നത്തെ മന്ത്രിസഭ യോഗം ചര്‍ച്ച ചെയ്യും. മുന്നറിയിപ്പില്ലാതെ രാത്രി സമയങ്ങളില്‍ തമിഴ്‌നാട് വെള്ളം തുറന്നുവിടുന്ന സാഹചര്യം ചൂണ്ടിക്കാട്ടി സുപ്രീം കോടതിയില്‍ അപേക്ഷ നല്‍ക്കാന്‍ സര്‍ക്കാര്‍ തീരുമാനിച്ചിരുന്നു.

ഇതിന്‍റെ അടിസ്ഥാനത്തില്‍ ഇന്ന് സുപ്രീംകോടതിയില്‍ അപേക്ഷ നല്‍കും. മുന്നറിയിപ്പില്ലാതെ തുറക്കരുതെന്നാണ് കേരളത്തിന്‍റെ ആവശ്യം. കേരളത്തിന്‍റെ അപേക്ഷ മറ്റന്നാള്‍ കോടതി പരിഗണിക്കും. വെള്ളം തുറന്നുവിടുന്നതിനു മുമ്പ് മുന്നറിയിപ്പ് നല്‍കണമെന്ന് തമിഴ്‌നാടിന് മുഖ്യമന്ത്രി പിണറായി വിജയൻ കത്തയച്ചിരുന്നു.

എന്നാല്‍ അതിനുശേഷവും രാത്രിയില്‍ വെള്ളം തുറന്ന് വിടുന്നത് തമിഴ്‌നാട് ആവര്‍ത്തിച്ചിരുന്നു. ഇതോടെ പല വീടുകളില്‍ വെള്ളം കയറുന്ന അവസ്ഥയുമുണ്ടായി. ഇക്കാര്യത്തില്‍ അവിടെയുളള ജനങ്ങള്‍ പ്രതിഷേധത്തിലാണ്.

ഇത് കണക്കിലെടുത്താണ് എന്ത് നടപടി വേണമെന്നത് സര്‍ക്കാര്‍ ആലോചന തുടങ്ങിയത്. പെരിയാര്‍ തീരത്തെ ജനങ്ങളുടെ ആശങ്ക തീര്‍ക്കാന്‍ കൂടുതല്‍ നടപടി ആലോചിക്കും.