കരുവന്നൂര്‍ ബാങ്ക് തട്ടിപ്പ് കേസ്; കേന്ദ്ര ഏജന്‍സികള്‍ക്ക് വിടണമെന്ന് കെ സുരേന്ദ്രൻ

ബാങ്ക് തട്ടിപ്പിലൂടെ ലഭിച്ച പണമാണ് നിയമസഭ പ്രചാരണത്തിന് ഉപയോഗിച്ചതെന്നും കേന്ദ്ര ഏജൻസികൾക്ക് കേസ് കൈമാറണമെന്നും കെ സുരേന്ദ്രൻ പറഞ്ഞു.

തിരുവനന്തപുരം:കരുവന്നൂര്‍ ബാങ്ക് തട്ടിപ്പ് കേസ് അന്വേഷണം കേന്ദ്ര ഏജന്‍സികള്‍ക്ക് വിടണമെന്ന് ബിജെപി സംസ്ഥാന പ്രസിഡന്‍റ് കെ.സുരേന്ദ്രന്‍. ബാങ്കില്‍ നടന്ന തട്ടിപ്പ് സിപിഎം നേതാക്കളുടെ അറിവോടെയാണ്. ഈ സിപിഎം നേതാക്കളെ രക്ഷിക്കാനാണ് ക്രൈംബ്രാഞ്ച് അന്വേഷണം നടത്തുന്നത്. ബാങ്ക് തട്ടിപ്പിലെ പണമാണ് സിപിഎം നിയമസഭാ തെരഞ്ഞെടുപ്പില്‍ ഉപയോഗിച്ചതെന്നും കെ സുരേന്ദ്രൻ ആരോപിച്ചു.

ഇരിങ്ങാലക്കുടയില്‍ മന്ത്രി ആര്‍.ബിന്ദുവിന്‍റെ പ്രചരണത്തിനടക്കം ഈ പണമാണ് ഉപയോഗിച്ചത്. തട്ടിപ്പ് നടത്തിയ പ്രതികളില്‍ പലരും രാജ്യം വിട്ടിട്ടുണ്ട്. അതുകൊണ്ട് തന്നെ ക്രൈംബ്രാഞ്ചിന് ഒന്നും ചെയ്യാനില്ല. അതിന് കേന്ദ്ര ഏജന്‍സികള്‍ തന്നെ വരണമെന്നും ഈ വിഷയം ഉന്നയിച്ച് ബിജെപി പ്രതിഷേധം ശക്തമാക്കുമെന്നും സുരേന്ദ്രന്‍ പറഞ്ഞു.