തിരുവനന്തപുരം :മട്ടന്നൂര്‍ നഗരസഭ തിരഞ്ഞെടുപ്പില്‍ എല്‍.ഡി.എഫിന് ഭരണം നിലനിര്‍ത്താനായെങ്കിലും യു.ഡി.എഫ് സീറ്റുകള്‍ ഇരട്ടിയാക്കി ഉയര്‍ത്തിയത് കേരളത്തിന്റെ മാറുന്ന രാഷ്ട്രീയത്തിന്റെ ഫല സൂചികയെന്ന് കെ.പി.സി.സി പ്രസിഡന്റ് കെ.സുധാകരന്‍. ജനവിധി അംഗീകരിക്കുന്നു. എല്‍.ഡി.എഫിന്റെ ഭൂരിപക്ഷം കുറയ്‌ക്കാനും യു.ഡി.എഫിന് നിലമെച്ചപ്പെടുത്താനും സാധിച്ചത് യു.ഡി.എഫ് പ്രവര്‍ത്തകരുടെ ഐക്യത്തിന്റെയും ഒരുമയുടെയും വിജയമാണെന്നും അദ്ദേഹം വാര്‍ത്താക്കുറിപ്പില്‍ വ്യക്തമാക്കി.
വിജയം യു.ഡി.എഫിന്റെ കഠിനാധ്വാനം :സമീപകാലങ്ങളില്‍ തദ്ദേശഭരണ ഉപതെരഞ്ഞെടുപ്പുകളില്‍ യു.ഡി.എഫ് നടത്തിയ മുന്നേറ്റം ഭരണമില്ലാതിരുന്നിട്ടും കേരളം മാറുന്നതിന്‍റെ സൂചനയാണ്. സി.പി.എം ചെങ്കോട്ടയെന്ന് വിശേഷിപ്പിക്കുന്ന മട്ടന്നൂര്‍ നഗരസഭയില്‍ ഏഴില്‍ നിന്ന് 14 ആയി സീറ്റ് വര്‍ധിപ്പിക്കുക എന്നത് യു.ഡി.എഫിനെ സംബന്ധിച്ച് വലിയ നേട്ടമാണ്. വര്‍ഗീയ കക്ഷികളുമായി ചേര്‍ന്നുള്ള വോട്ടുകച്ചവടവും കള്ളവോട്ടും ഉള്‍പ്പടെ നടത്തി ജനാധിപത്യത്തെ അട്ടിമറിക്കാന്‍ ശ്രമിച്ചിട്ടും അവരുടെ കോട്ടകളില്‍ തിളക്കമാര്‍ന്ന നേട്ടമാണ് കോണ്‍ഗ്രസും യു.ഡി.എഫും നേടിയത്.