'അഴിമതിയാണെങ്കില്‍ വച്ചുപൊറുപ്പിക്കില്ല': താക്കീതുമായി കെ. രാധാകൃഷ്‌ണൻ

പട്ടികജാതി വിഭാഗങ്ങള്‍ക്കുള്ള ഫണ്ട് ഈ വിഭാഗത്തിൽ ഉൾപ്പെടാത്ത വ്യക്തികൾ തട്ടിയെടുക്കുന്നതായുള്ള ആരോപണം ശക്തമായതിന് പിന്നാലെയാണ് അദ്ദേഹം ഉദ്യോഗസ്ഥർക്ക് മുന്നറിയിപ്പ് നൽകിയത്.

തിരുവനന്തപുരം:പട്ടികജാതി വിഭാഗക്കാർക്കുള്ള ഫണ്ട് തട്ടിയ വിവാദത്തിൽ ഉദ്യോഗസ്ഥർക്ക് മുന്നറിയിപ്പുമായി പട്ടികജാതി-പട്ടിക വകുപ്പ് മന്ത്രി കെ. രാധാകൃഷ്‌ണൻ. പാവപ്പെട്ടവരെ വഞ്ചിക്കുന്ന ഉദ്യോഗസ്ഥർക്ക് ഒരു പരിഗണനയും സർക്കാർ നൽകില്ലെന്ന് മന്ത്രി പറഞ്ഞു. പട്ടികജാതി വികസന ഡയറക്ടറേറ്റ് ആരംഭിച്ച ഇ- ഓഫിസിൻ്റെ ഉദ്ഘാടനം നിർവഹിക്കുകയായിരുന്നു അദ്ദേഹം.

തെറ്റായ കാര്യങ്ങൾ ചെയ്യുന്നവരുടെ സ്ഥാനം ഇപ്പോൾ എവിടെയാണെന്ന് എല്ലാവർക്കും അറിയാം. അത്തരം ഉദ്യോഗസ്ഥരെ വച്ചുപൊറുപ്പിക്കില്ല. നല്ല കാര്യങ്ങൾ ചെയ്യുന്ന ഉദ്യോഗസ്ഥർക്ക് എല്ലാ പിന്തുണയും സഹകരണവും നൽകും. പാവപ്പെട്ടവരുടെ ഫണ്ടിൽ കൈയ്യിട്ടു വാരുന്ന മാനസികാവസ്ഥയുള്ള ഉദ്യോഗസ്ഥരെ അത്തരത്തിൽ നേരിടും.

പട്ടികജാതി ഓഫീസുകളും ഉദ്യോഗസ്ഥരും കൂടുതൽ കാര്യക്ഷമമാകണം. പാവപ്പെട്ട ജനങ്ങൾക്ക് വേണ്ടി പ്രവർത്തിക്കാനാണ് ശമ്പളം വാങ്ങുന്നതെന്ന തിരിച്ചറിവ് ഉദ്യോഗസ്ഥർക്ക് ഉണ്ടാകണമെന്നും മന്ത്രി വ്യക്തമാക്കി. പട്ടികജാതി വിഭാഗങ്ങള്‍ക്കുള്ള ഫണ്ട് സിപിഎം നേതാക്കള്‍ തട്ടിയെടുക്കുന്നുവെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ നേരത്തേ ആരോപിച്ചിരുന്നു.