തിരുവനന്തപുരം: പിണറായി വിജയൻ, കമല്‍ ഹാസൻ, മമ്മൂട്ടി, മോഹൻലാല്‍, ശോഭന, എംഎ യൂസഫലി, എഎൻ ഷംസീർ, ആർ ബിന്ദു, കെ രാജൻ, വി ശിവൻ കുട്ടി, റോഷി അഗസ്റ്റിൻ, ആന്‍റണി രാജു, എകെ ശശീന്ദ്രൻ, വി അബ്‌ദുറഹ്‌മാൻ, കെഎൻ ബാലഗോപാല്‍, മുഹമ്മദ് റിയാസ്, കെ രാധാകൃഷ്‌ണൻ, കെ കൃഷ്‌ണൻകുട്ടി, വിവിധ രാജ്യങ്ങളില്‍ നിന്നുള്ള പ്രതിനിധികൾ ഇനിയുമുണ്ട് വേദി നിറഞ്ഞ് പേരുകൾ (keraleeyam Inauguration venue with confluence of stars).
അത്യപൂർവ താരസംഗമത്തിനൊപ്പം സംസ്ഥാന മന്ത്രിസഭയും തലസ്ഥാനത്തെ ജനപ്രതിനിധികളും നിറഞ്ഞപ്പോൾ സംസ്ഥാന സർക്കാരിന്‍റെ കേരളീയം വാരാഘോഷത്തിന്‍റെ ഉദ്‌ഘാടന വേദി പ്രൗഢഗംഭീരമായി. കേരളീയർക്ക് ഒരുമിച്ച് ആഘോഷിക്കാൻ എല്ലാ വർഷവും കേരളീയം പരിപാടി നടത്തുമെന്ന മുഖ്യമന്ത്രിയുടെ പ്രഖ്യാപനവും മോഹൻലാലിന്‍റെ സെല്‍ഫിയും ചടങ്ങിനെ അതിഗംഭീരമാക്കി. തിരുവനന്തപുരത്തെ 41 വേദികളിലായി നവംബർ ഏഴ് വരെയാണ് ആഘോഷം. കല, സംസ്‌കാരം, വ്യവസായം, കാർഷികം തുടങ്ങി കേരളത്തിന്‍റെ വിവിധ മേഖലകളുടെ പ്രദർശന നഗരകളും മേളകളും കേരളീയത്തിന്‍റെ ഭാഗമായുണ്ടാകും.
കേരളത്തിന്‍റെ മാഹാത്‌മ്യത്തെ (Greatness of Kerala) പുറം ലോകത്തേക്ക്‌ കൂടി വിളിച്ചോതുന്നതിനാണ്‌ ഏഴുദിവസത്തെ ഉത്സവാഘോഷത്തോടെ പരിപാടികള്‍ ആസൂത്രണം ചെയ്‌തിരിക്കുന്നത്‌. പ്രമുഖരായ പലരും ചടങ്ങില്‍ പങ്കെടുക്കുന്നതു കൊണ്ടു തന്നെ കാണികളും ആവേശത്തിലാണ്‌, ഒപ്പം റോഡ് ഷോയും പുലികളിയും പുഷ്‌പമേളയും ഫുഡ്‌ ഫെസ്റ്റിവലും ചലച്ചിത്ര മേളയും ഇത്തരത്തില്‍ നിരവധി പരിപാടികളാണ്‌ കേരളീയത്തിന്‍റെ ഭാഗമായി നടത്തുന്നത്‌. കേരളത്തിന്‍റെ മുഖമുദ്രയാക്കി കേരളീയം മാറും എന്നാണ്‌ കരുതപ്പെടുന്നത്‌.
കേരളീയത്തിന്‍റെ ഭാഗമായി നാല് സോണുകളായി തിരിച്ച് ആയിരത്തിലധികം പൊലീസ് ഉദ്യോഗസ്ഥരെയാണ് നിയോഗിച്ചിട്ടുള്ളത്. ശക്തമായ ഗതാഗത നിയന്ത്രണമുള്ളതിനാല്‍ പൊതുജനങ്ങള്‍ക്ക് സുഗമമായി വിവിധ വേദികള്‍ സന്ദര്‍ശിക്കുന്നതിന് കെഎസ്ആര്‍ടിസി സ്വിഫ്റ്റ് ഇലക്ട്രിക്ക് വാഹനങ്ങളും സജ്ജമാണ്.