തിരുവനന്തപുരം: വർക്കലയിൽ വീടിനു തീ പിടിച്ച് ഒരു കുടുംബത്തിലെ 5 പേർ വെന്ത് മരിച്ചു. മരിച്ചവരിൽ എട്ട് മാസം പ്രായമുള്ള കുട്ടിയും. ഒരാളെ ഗുരുതരാവസ്ഥയിൽ തിരുവനന്തപുരം കിംസ് ആശുപത്രിയിൽ പ്രവേശിപ്പിച്ചു.
വർക്കല ചെറുന്നിയൂർ രാഹുൽ നിവാസിൽ പ്രതാപൻ എന്ന ബേബിയുടെ വീടിനാണ് തീപിടിച്ചത്. വർക്കല പഴയ ചന്തയിൽ പച്ചക്കറിക്കട നടത്തുകയാണ് പ്രതാപൻ. പ്രതാപൻ(62), ഭാര്യ ഷെർലി(53) , മരുമകൾ അഭിരാമി (25), ഇളയ മകൻ അഖിൽ(29), 8 മാസം പ്രായമുള്ള കുഞ്ഞ് റയാൻ എന്നിവരാണ് മരണപ്പെട്ടത്. മൂത്ത മകൻ നിഹുലിനെയാണ് ഗുരുതരമായി പൊള്ളലേറ്റ് ആശുപത്രിയിൽ പ്രവേശിപ്പിച്ചത്. ഷോർട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.