തിരുവനന്തപുരം: രാജ്യവ്യാപകമായി ഇന്നാരംഭിക്കുന്ന കൊവിഡ് വാക്‌സിനായ കൊവിഷീല്‍ഡ് വിതരണത്തിന് സംസ്ഥാനം പൂര്‍ണ സജ്ജം. ആരോഗ്യ പ്രവര്‍ത്തകര്‍ക്കാണ് ആദ്യം പ്രതിരോധ കുത്തിവയ്പ്പ് നല്‍കുക. 133 കേന്ദ്രങ്ങളാണ് വിതരണത്തിനായി സംസ്ഥാനത്ത് സജ്ജമാക്കിയിരിക്കുന്നത്. ജില്ലാടിസ്ഥാനത്തില്‍ എറണാകുളത്ത് 12ഉം തിരുവനന്തപുരത്തും കോഴിക്കോട്ടും 11 കേന്ദ്രങ്ങള്‍ വീതവും സജ്ജമാക്കിയിട്ടുണ്ട്. ശേഷിക്കുന്ന ജില്ലകളില്‍ ഒൻപത്‌ കേന്ദ്രങ്ങള്‍ വീതമാണുള്ളത്.
കൂടുതല്‍ വായനക്ക്:സംസ്ഥാനത്ത് കൊവിഡ് വാക്‌സിൻ വിതരണം നാളെ
ആരോഗ്യ വകുപ്പിന്‍റെ മേല്‍നോട്ടത്തിലാണ് കുത്തിവെപ്പ് നടക്കുക. സംസ്ഥാനത്തെ വിവിധ വകുപ്പുകളും അന്താരാഷ്ട്ര ഏജന്‍സികളായ ഡബ്ല്യു.എച്ച്.ഒ., യൂണിസെഫ്, യു.എന്‍.ഡി.പി. തുടങ്ങിയവയുടെ സഹകരണത്തോടെയുമാണ് വാക്സിനേഷന്‍ യാഥാര്‍ഥ്യമാക്കുന്നത്‌. പ്രധാനമന്ത്രി നരേന്ദ്ര മോദി വാക്‌സിന്‍ വിതരണത്തിന്‍റെ ഉദ്‌ഘാടനം നിര്‍വഹിച്ച ശേഷമാകും രാജ്യവ്യാപകമായി ഇന്ന് വാക്‌സിന്‍ വിതരണം തുടങ്ങുക.