തിരുവനന്തപുരം :വൈദ്യുതി നിരക്ക് വർധനയ്ക്ക് പിന്നാലെ പൊതുജനങ്ങൾക്ക് ഇരട്ടി പ്രഹരമായി വെള്ളക്കരവും കൂട്ടുന്നു. ജല അതോറിറ്റിയുടെ ശുപാര്‍ശ ഫെബ്രുവരിയിൽ സര്‍ക്കാരിന് നൽകുമെന്നാണ് വിവരം. നിലവിലെ നിരക്ക് അഞ്ച് ശതമാനം കൂട്ടാനാണ് തീരുമാനം. ഏപ്രിൽ ഒന്ന് മുതൽ നിരക്ക് അഞ്ച് ശതമാനം കൂടുമെന്നാണ് സൂചന (Government Will Increase Water Charge In Kerala).
അടിസ്ഥാന താരിഫിൽ 5 % വർധന 2021 ഏപ്രിൽ മുതൽ വരുത്തുന്നുണ്ട്. ഇത് ഓരോ വർഷവും തുടരണമെന്നാണ് കേന്ദ്ര നിർദേശം. ലിറ്ററിന് ഒരു പൈസ കഴിഞ്ഞ ഫെബ്രുവരിയിൽ കൂട്ടിയിരുന്നു. വൈദ്യുതി നിരക്ക് വർധന മൂലം ജനങ്ങൾ പൊറുതിമുട്ടിയിരിക്കുകയാണ്. ഇതിന് പിന്നാലെയാണ് പുതിയ തീരുമാനം.
ഈ മാസം ഒന്നാം തീയതി മുതൽ മുൻകാല പ്രാബല്യത്തിൽ വൈദ്യുതി നിരക്ക് വർധിപ്പിക്കാൻ ആണ് റെഗുലേറ്ററി കമ്മിഷൻ ഉത്തരവിറക്കിയത്. യൂണിറ്റിന് പരമാവധി 30 പൈസ പ്രതിമാസ വര്‍ധനവുണ്ടാക്കുന്ന തരത്തിലുള്ള വര്‍ധനയ്ക്കാണ് റെഗുലേറ്ററി കമ്മിഷന്‍ കെഎസ്ഇബിക്ക് അനുമതി നല്‍കിയത്.
50 യൂണിറ്റ് വരെ പ്രതിമാസം ഉപയോഗിക്കുന്നവര്‍ക്ക് 40 പൈസയാണ് പുതിയ നിരക്ക്. 250 യൂണിറ്റ് വരെ ടെലിസ്‌കോപ്പിക് അഥവാ ഓരോ സ്ലാബിനും വെവ്വേറെ നിരക്കും 250 യൂണിറ്റിന് മുകളില്‍ നോണ്‍ ടെലി സ്‌കോപ്പിക് അഥവാ എല്ലാ യൂണിറ്റിനും ഒരേ നിരക്കുമാണ്.
കമ്മിഷന്‍ അംഗീകരിച്ച പുതുക്കിയ വൈദ്യുതി താരിഫ് പ്രകാരം ഉപഭോക്താക്കള്‍ക്ക് പരമാവധി 10 രൂപ മുതല്‍ 100 രൂപ വരെ പ്രതിമാസ വര്‍ധനയുണ്ടാകും. കേരളത്തില്‍ വൈദ്യുതി നിരക്ക് രണ്ടുമാസത്തിലൊരിക്കലാണ് ഈടാക്കുന്നതെന്നത് കണക്കിലെടുത്താല്‍ ഇനി മുതല്‍ ഓരോ തവണയും വൈദ്യുതി ബില്ലില്‍ 20 മുതല്‍ 200 രൂപ വരെ ഓരോ ഉപഭോക്താവിനും വര്‍ധിക്കും.