ലക്ഷദ്വീപിന്‍റെ പേരിൽ നടക്കുന്നത് കള്ളപ്രചരണങ്ങൾ: കെ സുരേന്ദ്രൻ

ഇടതുപക്ഷവും കോൺഗ്രസും തീവ്രവാദികളുമാണ് നുണ പ്രചരണങ്ങൾ നടത്തുന്നതെന്നും സുരേന്ദ്രൻ ആരോപിച്ചു

തിരുവനന്തപുരം: ലക്ഷദ്വീപിന്‍റെ പേരിൽ വ്യാപക കള്ളപ്രചരണങ്ങൾ നടക്കുന്നുവെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ. ഇടതുപക്ഷവും കോൺഗ്രസും തീവ്രവാദികളുമാണ് ഇത്തരം പ്രചരണങ്ങൾ നടത്തിക്കൊണ്ടിരിക്കുന്നത്. ഇവർ ടൂൾ കിറ്റ് തയ്യാറാക്കി ഒരേ കാര്യം പറഞ്ഞു കൊണ്ടിരിക്കുന്നുവെന്ന് സുരേന്ദ്രൻ ആരോപിച്ചു.

സഞ്ചാരത്തിനും ചരക്കു നീക്കത്തിനും ബേപ്പൂർ തുറമുഖം ഒഴിവാക്കി മംഗലാപുരം തുറമുഖം ഏറ്റെടുത്തതിന് പിന്നിൽ ബേപ്പൂർ തുറമുഖത്തിന്‍റെ അടിസ്ഥാന സൗകര്യം വർധിപ്പിക്കാത്ത ഉമ്മൻചാണ്ടി, പിണറായി സർക്കാരുകൾ ആണ്. നുണപ്രചാരണങ്ങൾ നടത്തുന്നവർക്കൊപ്പം സിനിമാതാരങ്ങളും കൂടിയിരിക്കുകയാണ്. ലക്ഷദ്വീപിൽ ആകെ 10 പശുക്കൾ മാത്രമാണ് ഉള്ളത്. ഇത് കൊണ്ട് തന്നെ പാൽ ലഭിക്കുന്നത് വിഐപികൾക്ക് മാത്രമാണെന്നും അതിനാലാണ് അമൂൽ ഉത്പന്നങ്ങൾ അവിടെ എത്തിക്കാൻ തീരുമാനിച്ചതെന്നും സുരേന്ദ്രൻ കൂട്ടിച്ചേർത്തു.

ലക്ഷദ്വീപിൽ ക്രിമിനലുകൾ ഇല്ലെങ്കിൽ എന്തിനാണ് ഗുണ്ടാ നിയമത്തെ ഭയപ്പെടുന്നത്. അഡ്മിനിസ്ട്രേറ്റർ സുരക്ഷാ നടപടികളാണ് സ്വീകരിച്ചത്. ലക്ഷദ്വീപിൽ ആളൊഴിഞ്ഞ സ്ഥലങ്ങളിൽ തീവ്രവാദ സാന്നിധ്യവും വെടിക്കോപ്പുകളും കണ്ടെത്തിയിരുന്നു. ലക്ഷദ്വീപിൽ ഒരു മാംസവും നിരോധിച്ചിട്ടില്ല. മദ്യം നൽകാനുള്ള തീരുമാനം ടൂറിസത്തിന്‍റെ ഭാഗമാണെന്നും സുരേന്ദ്രൻ പറഞ്ഞു.

കൊടകര കുഴൽപണ കേസിൽ പൊലീസ് നടപടി നിയമ വിരുദ്ധമാണെന്നും കെ സുരേന്ദ്രൻ ആരോപിച്ചു. ഈ കേസ് ബിജെപിയുമായി ബന്ധിപ്പിക്കാൻ ശ്രമിക്കുകയാണ്. ചോദ്യം ചെയ്യലിന് വിളിപ്പിച്ച ബിജെപി നേതാക്കൾ ഹാജരാകാത്തത് പൊലീസിനോട് സംസാരിച്ച ശേഷമാണെന്നും അവർ ഹാജരാകാൻ സമയം ചോദിക്കുകയാണ് ഉണ്ടായതെന്നും സുരേന്ദ്രൻ പറഞ്ഞു.