കൊവിഡ് രോഗികളുള്ള കെഎസ്‌ഇബി മുന്‍ ഉദ്യോഗസ്ഥന്‍റെ വീട്ടിലെ വൈദ്യുതി കണക്ഷൻ വിഛേദിച്ചു

83കാരനും മകളും അവരുടെ രണ്ട് പെണ്‍മക്കളും അടങ്ങുന്ന കുടുംബത്തിന്‍റെ വൈദ്യുതി കണക്ഷനാണ്‌ വിഛേദിച്ചത്‌

തിരുവനന്തപുരം : തിരുവനന്തപുരം പോങ്ങുംമൂട്ടിൽ കൊവിഡ് പോസിറ്റീവ് രോഗികൾ താമസിക്കുന്ന വീട്ടിലെ വൈദ്യുതി കണക്ഷൻ, ബില്ലടയ്ക്കാത്തതിനെ തുടർന്ന് കെ.എസ്.ഇ.ബി അധികൃതർ വിഛേദിച്ചു. 83കാരനും അദ്ദേഹത്തിന്‍റെ മകളും അവരുടെ രണ്ട് പെണ്‍കുട്ടികളും അടങ്ങുന്നതാണ് കുടുംബം.

83 കാരനായ രാജൻ മുൻ കെ എസ് ഇ ബി ഉദ്യോഗസ്ഥനാണ്. മകള്‍ക്കും അവരുടെ രണ്ട് പെണ്‍കുട്ടികള്‍ക്കുമാണ്‌ കൊവിഡ് സ്ഥിരീകരിച്ചത്‌. രണ്ട് ദിവസം മുൻപ് കെ.എസ്.ഇ.ബി ജീവനക്കാർ വൈദ്യുതി വിഛേദിക്കാനെത്തിയപ്പോള്‍ കൊവിഡാണെന്നും കഴിഞ്ഞാലുടൻ പണം അടയ്ക്കാമെന്നും വീട്ടുകാർ പറഞ്ഞിരുന്നു.

എന്നാൽ ഒരു മുന്നറിയിപ്പുമില്ലാതെ ശനിയാഴ്‌ച രാവിലെയെത്തി വൈദ്യുതി വിഛേദിക്കുകയായിരുന്നു. ഉച്ചയ്ക്ക് ശേഷം പണം കടം വാങ്ങി തൊട്ടടുത്ത വീട്ടുകാരിലൊരാൾ കെ എസ് ഇ ബി യിൽ പണം അടച്ചതിന് ശേഷമാണ് വൈദ്യുതി ലഭിച്ചത്. കെ എസ് ഇ ബി മുൻ ഉദ്യോഗസ്ഥനാണ് താനെന്ന് പറഞ്ഞിട്ടും മുഖവിലയ്‌ക്കെടുത്തില്ലെന്നും രാജന്‍ പറഞ്ഞു. ഡിസംബർ 23നാണ് കുടുംബത്തിന് കൊവിഡ് സ്ഥിരീകരിച്ചത്.