നഗരത്തില്‍ ഇന്ന് കുടിവെള്ളം മുടങ്ങും

നാളെ രാത്രിയോടെ ജലവിതരണം പൂർണമായും പുനഃസ്ഥാപിക്കും.

തിരുവനന്തപുരം: നഗരത്തിലെ വിവിധ മേഖലകളിൽ ഇന്ന് ഉച്ച മുതൽ നാളെ രാവിലെ വരെ കുടിവെള്ളം മുടങ്ങും. അരുവിക്കര ജല ശുദ്ധീകരണശാലയുടെ രണ്ടാം ഘട്ട നവീകരണ പണികൾ നടക്കുന്നതിനാലാണ് ജലവിതരണം മുടങ്ങുക.

ജല അതോറിറ്റിയുടെ കവടിയാർ, പേരൂർക്കട സെക്ഷൻ പരിധിയിലാണ് കുടിവെള്ളം മുടങ്ങുക. അവശ്യ ഘട്ടങ്ങളിൽ ജല അതോറിറ്റിയുടെ വെള്ളയമ്പലം, പി.ടി.പി നഗർ എന്നിവിടങ്ങളിലെ വെൻഡിങ് പോയിന്‍റുകളിൽ നിന്നും ടാങ്കർ ലോറികളിൽ വെള്ളമെത്തിക്കാന്‍ സൗകര്യമൊരുക്കിയിട്ടുണ്ട്.

നവീകരണം നടക്കുന്ന 86 എംഎൽഡി പ്ലാന്‍റിൽ നാളെ രാവിലെ പമ്പിങ് പുനരാരംഭിക്കും. നാളെ രാത്രിയോടെ ജലവിതരണം പൂർണമായും പുനഃസ്ഥാപിക്കുമെന്ന് ജല അതോറിറ്റി അറിയിച്ചു.