തിരുവനന്തപുരം : കൊട്ടാരക്കര താലൂക്ക് ആശുപത്രിയുടെ പുതിയ ബ്ലോക്കിന് ഡോ. വന്ദന ദാസിന്‍റെ പേര് നല്‍കും. ആരോഗ്യമന്ത്രി വീണ ജോർജാണ് ഇത്തരമൊരു നിർദേശം നൽകിയത്. ആരോഗ്യ വകുപ്പ് ഡയറക്‌ടര്‍ക്കാണ് മന്ത്രി നിര്‍ദേശം നല്‍കിയിരിക്കുന്നത്. വന്ദനയോടുള്ള ആദര സൂചകമായാണ് പേര് നല്‍കുന്നത്.
കഴിഞ്ഞ ദിവസമാണ് കൊട്ടാരക്കര താലൂക്ക് ആശുപത്രിയിൽ ചികിത്സയ്ക്ക് പൊലീസ് എത്തിച്ചയാളുടെ കുത്തേറ്റ് ഡോക്‌ടർ വന്ദന ദാസ് മരിച്ചത്. ഇതേ തുടർന്ന് ആശുപത്രികളില്‍ സുരക്ഷ ഉറപ്പാക്കണം എന്ന് ആവശ്യപ്പെട്ട് കേരളത്തിലെ ഡോക്‌ടർമാർ സമരം ചെയ്യുകയാണ്. സർക്കാർ സ്വകാര്യ മേഖലയിലെ മുഴുവൻ ഡോക്‌ടർമാരും അത്യാഹിത വിഭാഗവും ലേബർ റൂമും ഒഴികെയുള്ള സേവനങ്ങൾ നിർത്തിവച്ചാണ് പണിമുടക്ക് നടത്തുന്നത്.