തിരുവനന്തപുരം:ന്യൂയോർക്ക് ലോങ് ഐലൻഡ് അന്താരാഷ്ട്ര ചലച്ചിത്രോത്സവത്തിൽ പുരസ്‌കാരങ്ങൾ വാരിക്കൂട്ടിയ 'ധരണി' എന്ന ചിത്രം നവംബറിൽ തിയറ്ററുകളിൽ റിലീസ് ചെയ്യുമെന്ന് സംവിധായകൻ ശ്രീവല്ലഭൻ. ഒടിടി പ്ലാറ്റ്‌ഫോമിലൂടെയാണ് 'ധരണി' റിലീസ് ചെയ്യാൻ തീരുമാനിച്ചിരിക്കുന്നതെങ്കിലും കേരളത്തിൽ നാല് തിയറ്ററുകളിലെങ്കിലും ചിത്രം പ്രദർശനത്തിനെത്തുമെന്നും അദ്ദേഹം പ്രസ് ക്ലബ്ബിൽ നടന്ന മീറ്റ് ദി പ്രസിൽ പറഞ്ഞു. സിനിമ സീരിയൽ നടൻ എം.ആർ ഗോപകുമാർ മീറ്റ് ദി പ്രസിൽ പങ്കെടുത്തു.
ന്യൂയോർക്ക് ലോങ് ഐലൻഡ് അന്താരാഷ്ട്ര ചലച്ചിത്രോത്സവത്തിൽ മികച്ച ഛായാഗ്രഹണം (ജിജു സണ്ണി), മികച്ച അന്താരാഷ്ട്ര ചിത്രം, മികച്ച രണ്ടാമത്തെ നടൻ (എം.ആർ ഗോപകുമാർ) എന്നീ അവാർഡുകളാണ് ചിത്രം കരസ്ഥമാക്കിയത്. പാരലാക്‌സ്‌ ഫിലിം ഹൗസ്‌ ആണ് ചിത്രത്തിൻ്റെ നിർമാണം. ശ്യാമം, പകരം , പച്ച എന്നീ ചിത്രങ്ങൾക്ക് ശേഷം ശ്രീവല്ലഭൻ സംവിധാനം ചെയ്യുന്ന ചിത്രമാണ് ധരണി.