തിരുവനന്തപുരം:ഫാൻസി നമ്പർ നിരക്ക് വർധിപ്പിക്കാൻ മോട്ടോർ വാഹന വകുപ്പിന്‍റെ ശുപാർശ. ഫാൻസി അല്ലാത്ത നമ്പർ ബുക്ക് ചെയ്യുന്നതിന് അടിസ്ഥാന നിരക്ക് 3000ൽ നിന്ന് 5000 രൂപയാക്കാനും ഫാൻസി നമ്പറിന് അടിസ്ഥാന നിരക്ക് 5000 എന്നത് 10000 രൂപയാക്കി ഉയർത്താനുമാണ് ശുപാർശ. ഓട്ടോറിക്ഷ ഒഴിച്ച് ബാക്കി എല്ലാ വാഹനങ്ങളുടെയും പെർമിറ്റിനും നിരക്ക് വർധനയ്ക്കും ശുപാർശയുമായി കരട് ഉത്തരവ് ഇറക്കി (Motor Vehicles Department Will Increase Fancy Number Rates In Kerala).
ഫാൻസി നമ്പറുകളുടെ പ്രത്യേകത അനുസരിച്ച് 25000, 50000 എന്നിങ്ങനെയാണ് സ്ലാബുകൾ. ഏത് സീരീസിൽ ആയാലും 1 എന്ന നമ്പർ ബുക്ക് ചെയ്യുന്നതിന് ഒരു ലക്ഷം രൂപയാണ് നിരക്ക്. മാത്രമല്ല അടിസ്ഥാന നിരക്കായ 3000ന് ബുക്ക് ചെയ്യാനാകുമായിരുന്ന ചില നമ്പറുകൾ പതിനായിരം എന്ന സ്ലാബിലേക്ക് ഉയർത്തുകയും ചെയ്‌തു. 10000 ന്‍റെ സ്ലാബിലേക്ക് ലഭിക്കുമായിരുന്ന നമ്പറുകൾ 25000ന്‍റെ സ്ലാബിലേക്ക് ഉയർത്തുകയും ചെയ്‌തു.
പെർമിറ്റ് ഫീസും ഉയർത്തിയിട്ടുണ്ട്. ടാക്‌സി വാഹനങ്ങൾക്ക് 700 രൂപ ആയിരുന്ന പെർമിറ്റ് 1000 രൂപയാക്കി. ചെറിയ ഗുഡ്‌സ്‌ വാഹനങ്ങൾക്ക് 1000 രൂപയായിരുന്ന പെർമിറ്റ്ഫീസ് 1500 രൂപയാക്കി ഉയർത്തി. ഹെവി ഗുഡ്‌സ്‌ വാഹനങ്ങൾക്ക് 1800 ൽ നിന്ന് 2250 ആക്കിയും 14 സീറ്റ് വരെയുള്ള കോൺട്രാക്‌ട്‌ ക്യാരേജ് വാഹനങ്ങൾക്ക് 2250 എന്നത് 4500 രൂപയും 21 സീറ്റിനു മുകളിലുള്ള ഹെവി വാഹനങ്ങൾക്ക് പെർമിറ്റ് ഫീസ് 3800 രൂപ എന്നത് 5,250 ആയും ഉയരും.
ALSO READ:New registration series Government Vehicles| KL-90 പുതിയ രജിസ്ട്രേഷൻ സീരീസിനൊരുങ്ങി സർക്കാർ വാഹനങ്ങൾ