തിരുവനന്തപുരം:തെന്നിന്ത്യന്‍ താരം സോണിയ അഗര്‍വാള്‍ കേന്ദ്രകഥാപാത്രമായെത്തുന്ന 'കർട്ടൻ' എന്ന ചിത്രത്തിന്റെ ടൈറ്റിൽ പോസ്റ്റർ റിലീസ് ചെയ്‌തു. തമിഴ് സൂപ്പര്‍ താരം വിജയ്‌ സേതുപതി, സംവിധായകന്‍ എം പദ്‌മകുമാര്‍, പ്രൊഡക്ഷന്‍ കണ്‍ട്രോളര്‍ എന്‍ എം ബാദുഷ, നിര്‍മ്മാതാവ് നൗഷാദ് ആലത്തൂര്‍ എന്നിവരുടെ ഔദ്യോഗിക ഫേസ്‌ബുക്ക് പേജിലൂടെയാണ് പോസ്റ്റര്‍ പുറത്തുവിട്ടത്. പാവക്കുട്ടി ക്രിയേഷന്‍സിന്‍റ ബാനറിലൊരുങ്ങുന്ന ചിത്രം അമ്‌ഹന്‍ റാഫിയാണ് സംവിധാനം ചെയ്യുന്നത്.
മകൾക്ക് വേണ്ടി ഒരമ്മ നടത്തുന്ന പോരാട്ടത്തിന്‍റെ കഥ പറയുന്ന ചിത്രം ഹൊറർ ഇമോഷണൽ ത്രില്ലറായാണ് ഒരുക്കിയിരിക്കുന്നത്. ജിനു.ഇ തോമസ് ആണ് നായകൻ. മെറീന മൈക്കിൾ, സിനോജ് വർഗീസ്, അമ്ഹൻ റാഫി, വി.കെ ബൈജു, ശിവജി ഗുരുവായൂർ, കണ്ണൻ സാഗർ, ജെൻസൺ ആലപ്പാട്ട്, ശിവദാസൻ മാറമ്പിള്ളി, അമ്പിളി സുനിൽ സൂര്യലാൽ ശിവജി തുടങ്ങിയ താരനിരയും ചിത്രത്തിൽ അണിനിരക്കുന്നുണ്ട്.