തിരുവനന്തപുരം:നിരവധി നിര്‍ണ്ണായക വിഷയങ്ങള്‍ നിലനില്‍ക്കുന്ന സാഹചര്യത്തില്‍ സിപിഎം സംസ്ഥാന സെക്രട്ടേറിയറ്റ് ഇന്ന് ചേരും. സര്‍ക്കാറിനെതിരെ ഗവര്‍ണ്ണർ ഉന്നയിച്ച വിമര്‍ശനങ്ങളാണ് ഇതില്‍ പ്രധാനം. ഒരു മാസത്തിനു ശേഷം നിയമസഭയില്‍ നയപ്രഖ്യാപനപ്രസംഗം നടത്തേണ്ട ഗവര്‍ണര്‍ ആരിഫ് മുഹമ്മദ് ഖാന്‍ സര്‍ക്കാരുമായി കടുത്ത അഭിപ്രായവ്യത്യാസത്തില്‍ തുടരുന്നത് ഗൗരവമായാണ് സിപിഎം കണക്കാക്കുന്നത്. അതുകൊണ്ട് തന്നെ ഇക്കാര്യത്തില്‍ നിര്‍ണ്ണായക നിലപാട് വേണമെന്ന് സിപിഎമ്മിലും ഇടതുമുന്നണിയിലും അഭിപ്രായമുണ്ട്.
കണ്ണൂര്‍ വൈസ് ചാന്‍സലര്‍ ആയി ഡോ. ഗോപിനാഥ് രവീന്ദ്രനു പുനര്‍നിയമനം നല്‍കണമെന്നു ആവശ്യപ്പെട്ട്‌ ഉന്നതവിദ്യാഭ്യാസ മന്ത്രി ആര്‍.ബിന്ദു ഗവര്‍ണര്‍ക്ക് കത്തയച്ചതും സെക്രട്ടേറിയറ്റില്‍ ചര്‍ച്ചയായേക്കും. സില്‍വര്‍ലൈന്‍ പദ്ധതിക്കെതിരായ ജനകീയ പ്രതിഷേധം ശക്തമാകുന്നതും ഇടതുപക്ഷത്തുനിന്നു തന്നെ എതിര്‍പ്പുകള്‍ ഉയരുന്നതും സെക്രട്ടേറിയറ്റ് പരിശോധിക്കും.