തിരുവനന്തപുരം: സിപിഎം നേതൃയോഗങ്ങൾക്ക് ഇന്ന് തുടക്കം. ബഫർ സോൺ, ലീഗ്, സജി ചെറിയാൻ, ട്രേഡ് യൂണിയന്‍ രേഖ, മറ്റു പരിഗണന വിഷയങ്ങൾ തുടങ്ങിയവയാണ് യോഗത്തില്‍ ചര്‍ച്ച ചെയ്യുക. മൂന്നുദിവസം നീളുന്ന സിപിഎം സംസ്ഥാന നേതൃയോഗങ്ങളിൽ നിരവധി വിവാദ വിഷയങ്ങളാകും പരിഗണനയ്ക്ക് വരിക.
ഏറെ സജീവമായ ബഫർസോൺ വിഷയം യോഗം വിശദമായി പരിശോധിക്കും. സർക്കാരിനെതിരെ പലകോണുകളിൽ നിന്നു പ്രതിഷേധം കനക്കുന്ന സാഹചര്യമാണ് പാർട്ടി പരിശോധിക്കുക. സിപിഎം പ്രദേശിക നേതാക്കൾ പോലും ഇത്തരം പ്രതിഷേധങ്ങളുടെ ഭാഗമാകുന്നുണ്ട്.
അതുകൊണ്ട് തന്നെ ജനങ്ങളുടെ ആശങ്കയകറ്റുന്ന ഇടപെടലാണ് സിപിഎം ആഗ്രഹിക്കുന്നത്. ഇതു വരെ സ്വീകരിച്ച നടപടികൾ മുഖ്യമന്ത്രി യോഗത്തിൽ വിശദീകരിക്കാനും സാധ്യതയുണ്ട്. ഭരണഘടന വിരുദ്ധ പരാമർശത്തിന്‍റെ പേരിൽ മന്ത്രി സ്ഥാനം രാജിവച്ച സജി ചെറിയാന്‍റെ തിരിച്ചു വരവാണ് നേതൃയോഗം പരിഗണിക്കാൻ സാധ്യതയുള്ള മറ്റൊരു വിഷയം.