തിരുവനന്തപുരം :ഉന്നത വിദ്യാഭ്യാസ സ്ഥാപനങ്ങള്‍ ഒക്‌ടോബര്‍ നാലിന് തുറക്കുമ്പോള്‍ ആര്‍ട്‌സ് ആന്‍ഡ് സയന്‍സ് കോളജുകള്‍, സാങ്കേതിക സര്‍വകലാശാലകള്‍, പോളിടെക്‌നിക്കുകള്‍ എന്നിവിടങ്ങളിലെ അവസാന വര്‍ഷ വിദ്യാര്‍ഥികള്‍ക്കാണ് പ്രവേശനമെന്ന് ഉന്നത വിദ്യാഭ്യാസമന്ത്രി ആര്‍.ബിന്ദു ഇ.ടി.വി ഭാരതിനോട്.
കോളജുകള്‍ തുറക്കുന്ന ദിനം വിദ്യാര്‍ഥികള്‍ക്ക് കൊവിഡ് ജാഗ്രത ഓറിയന്‍റേഷന്‍ ക്ലാസ് നല്‍കുമെന്ന് മന്ത്രി.
സാമൂഹ്യ അകലം പാലിക്കല്‍, മാസ്‌ക്, സാനിറ്റൈസര്‍ എന്നിവ ഉപയോഗിക്കേണ്ടതിന്‍റെ അനിവാര്യത തുടങ്ങിയവ സംബന്ധിച്ച് കോളജ് തുറക്കുന്ന ആദ്യ ദിവസം തന്നെ ഓറിയന്‍റേഷന്‍ ക്ലാസുകള്‍ സംഘടിപ്പിക്കും.
കോളജുകളില്‍ സാനിറ്റൈസര്‍, തെര്‍മല്‍ സ്‌കാനര്‍ എന്നിവ നിര്‍ബന്ധമാണെന്ന് സ്ഥാപന മേധാവികള്‍ക്ക് നിര്‍ദേശം നല്‍കിയിട്ടുണ്ട്. ക്ളാസുകള്‍, ലാബുകള്‍, സെമിനാര്‍ ഹാളുകള്‍ എന്നിവ അണുവിമുക്തമാക്കും.