പരസ്‌പരം വിട്ടുകൊടുക്കാതെ ഗ്രൂപ്പുകളും നേതാക്കളും; കോൺഗ്രസിൽ സ്ഥിതി രൂക്ഷം

ഗ്രൂപ്പ് നേതാക്കളാക്കി മാത്രം ചിത്രീകരിച്ച് ഒതുക്കാനുള്ള ശ്രമമാണ് നടക്കുന്നതെന്ന് ഉമ്മന്‍ചാണ്ടിയും രമേശ് ചെന്നിത്തലയും പറയുന്നു. ഇതിനെ പ്രതികരിക്കാനുള്ള ശ്രമമാണ് ഇപ്പോള്‍ നടക്കുന്നത്

തിരുവനന്തപുരം: ഡി.സി.സി പുനഃസംഘടനയില്‍ കോണ്‍ഗ്രസിനുളളില്‍ പ്രശ്‌നങ്ങള്‍ തുടരുന്നു. എ,ഐ ഗ്രൂപ്പുകളും കെ.സുധാകരനും, വി.ഡി.സതീശനും പരസ്പരം ഒരു വിട്ടു വീഴ്ചയ്ക്കില്ലെന്ന് നിലപാടില്‍ ഉറച്ചു നില്‍ക്കുകയാണ്.

ഗ്രൂപ്പ് നേതാക്കളാക്കി മാത്രം ചിത്രീകരിച്ച് ഒതുക്കാനുള്ള ശ്രമമാണ് നടക്കുന്നതെന്ന് ഉമ്മന്‍ചാണ്ടിയും രമേശ് ചെന്നിത്തലയും പറയുന്നു. ഇതിനെ പ്രതികരിക്കാനുള്ള ശ്രമമാണ് ഇപ്പോള്‍ നടക്കുന്നത്. കൂടുതല്‍ നേതാക്കള്‍ ഡി.സി.സി പുനഃസംഘനയ്‌ക്കെതിരെ പ്രതികരണവുമായി രംഗത്തെത്തുന്നുണ്ട്. പുനഃസംഘടന കൂടാതെ സുധാകരന്‍റെ പ്രതികരണത്തിലും ഉമ്മന്‍ചാണ്ടി കടുത്ത അമര്‍ഷത്തിലാണ്.

സുധാകരന്‍റെ വാദം തള്ളി എ ഗ്രൂപ്പ്

രണ്ട് പ്രാവശ്യം ചര്‍ച്ച നടത്തിയെന്ന സുധാകരന്‍റെ വാദം തെറ്റാണെന്നാണ് എ ഗ്രൂപ്പ് വ്യക്തമാക്കുന്നത്. ഒരു തവണ മാത്രമാണ് ചര്‍ച്ച നടത്തിയത്. അന്ന് വിഡി സതീശനും ഒപ്പമുണ്ടായിരുന്നു. രണ്ട് പ്രാവശ്യം ചര്‍ച്ച നടന്നിരുന്നെങ്കില്‍ തര്‍ക്കമുണ്ടാകില്ലായിരുന്നു.

ആദ്യം ചര്‍ച്ച ചെയ്തപ്പോള്‍ നല്‍കിയ ലിസ്റ്റാണ് സുധാകരന്‍ വാര്‍ത്താ സമ്മേളനത്തില്‍ ഉയര്‍ത്തിക്കാട്ടിയത്. അതില്‍ വിശദ ചര്‍ച്ച നടന്നിട്ടില്ലെന്നും എ ഗ്രൂപ്പ് പറയുന്നു. രണ്ടാം വട്ടം ചര്‍ച്ച നടന്നിട്ടുണ്ടെങ്കില്‍ അത് എവിടെ വച്ചാണ് നടന്നതെന്നും വിശദാംശങ്ങള്‍ എന്താണെന്നും വ്യക്തമാക്കണമെന്ന് എ ഗ്രൂപ്പ് ആവശ്യപ്പെടുന്നു.

ചർച്ചക്ക് ശേഷം പറയാമെന്ന് ഉമ്മന്‍ചാണ്ടി

പരസ്യ പ്രതികരണത്തിന് ഉമ്മന്‍ചാണ്ടി തയാറായിട്ടില്ല. കെ സുധാകരനുമായി സംസാരിച്ച ശേഷം മാധ്യമങ്ങളെ കാണാമെന്നാണ് ഉമ്മന്‍ചാണ്ടി അറിയിച്ചിരിക്കുന്നത്.

രമേശ് ചെന്നിത്തലയും ഈ നിലപാടില്‍ തന്നെയാണ്. എന്നാല്‍ ഒപ്പമുള്ളവര്‍ സുധാകരനും സതീശനും അടങ്ങുന്ന പുതിയ അധികാരകേന്ദ്രങ്ങളോട് അടുക്കുന്നത് ഗ്രൂപ്പ് നേതാക്കള്‍ക്ക് വലിയ വെല്ലുവിളിയാണ്.