തിരുവനന്തപുരം:പ്രശസ്‌ത സിനിമ നിര്‍മാതാവ് ജനറല്‍ പിക്ചേഴ്‌സിന്‍റെ അമരക്കാരന്‍ കെ.രവീന്ദ്രന്‍ നായര്‍ എന്ന അച്ചാണി രവിയുടെ നിര്യാണത്തില്‍ ദു:ഖം രേഖപ്പെടുത്തി മുഖ്യമന്ത്രി പിണറായി വിജയനും പ്രതിപക്ഷ നേതാവ് വിഡി സതീശനും. കലാമൂല്യമുള്ള നിരവധി സിനിമകൾ നിർമിച്ച് മലയാളത്തിൽ പുതിയൊരു ചലച്ചിത്ര ഭാവുകത്വം ഉണ്ടാക്കിയ വ്യക്തിയായിരുന്നു അന്തരിച്ച സിനിമ നിര്‍മാതാവ് അച്ചാണി രവിയെന്ന് മുഖ്യമന്ത്രി പിണറായി വിജയൻ.
വാണിജ്യ സിനിമകൾക്കല്ലാതെ കലാമൂല്യമുള്ള സിനിമകൾക്ക് പണം മുടക്കാനായി ആളില്ലാത്ത ഘട്ടത്തിൽ ലാഭം നോക്കാതെ ചലച്ചിത്ര മേഖലയുടെ നിലവാരം ഉയർത്തുന്നതിന് ഇടപെട്ട ശ്രദ്ധേയനായ നിർമാതാവായിരുന്നു അദ്ദേഹമെന്നും മുഖ്യമന്ത്രി അനുശോചന സന്ദേശത്തിൽ പറഞ്ഞു.
മലയാളത്തിന് നല്ല സംവിധായകരെയും നല്ല സിനിമകളും നല്‍കിയ നിര്‍മാതാവായിരുന്നു അച്ചാണി രവിയെന്ന് പ്രതിപക്ഷ നേതാവ് പറഞ്ഞു. 'വിപണന തന്ത്രത്തില്‍ ഉപരി കലാ മൂല്യത്തില്‍ ഒരു വിട്ടുവീഴ്‌ചയും ചെയ്യാത്ത നിര്‍മാതാവ്. ജനറല്‍ പിക്ചേഴ്സ് നിര്‍മിച്ച 14 സിനിമകള്‍ക്കും, 18 ദേശീയ - സംസ്ഥാന പുരസ്‌കാരങ്ങള്‍ ലഭിച്ചതാണ് അതിനുള്ള തെളിവ്. സിനിമയില്‍ നിന്ന് കിട്ടുന്ന ലാഭം മുഴുവന്‍ കലാ, സാംസ്‌കാരിക രംഗത്ത് ചെലവഴിച്ച മനുഷ്യ സ്‌നേഹി.
കൊല്ലം നഗരത്തില്‍ പബ്ലിക് ലൈബ്രറി ആന്‍ഡ് റിസര്‍ച്ച് സെന്‍റര്‍, സോപാനം കലാകേന്ദ്രം, ചില്‍ഡ്രന്‍സ് ലൈബ്രറി, ആര്‍ട്ട് ഗാലറി, ബാല ഭവന്‍ കെട്ടിടം, തിയേറ്ററുകള്‍ അങ്ങനെ നിരവധി സംഭാവനകള്‍ അദ്ദേഹത്തിന്‍റേതായുണ്ട്. കൊല്ലത്തിന്‍റെ കശുവണ്ടിപ്പെരുമ ലോകത്തിന്‍റെ വിവിധ ഭാഗങ്ങളില്‍ എത്തിക്കുന്നതിന് ഒപ്പമാണ് അദ്ദേഹം സിനിമ രംഗത്തും സജീവമായത്. അച്ചാണി രവിയുടെ നിര്യാണം സിനിമ, സാംസ്‌കാരിക മേഖലയുടെ നഷ്‌ടമാണ്. കുടുംബാംഗങ്ങളുടെയും സുഹൃത്തുക്കളുടെയും ദുഃഖത്തില്‍ പങ്കുചേരുന്നു.' -വിഡി സതീശന്‍ പറഞ്ഞു.