സർക്കാരിന്‍റെ ജനപിന്തുണ വർദ്ധിച്ചു; ജാതി സംഘടനകൾക്ക് കേരളത്തില്‍ വേരോട്ടമില്ലെന്നും മുഖ്യമന്ത്രി

91 എം.എല്‍.എമാര്‍ ഉണ്ടായിരുന്ന സര്‍ക്കാരിന് ഇപ്പോള്‍ 93 അംഗങ്ങളുടെ പിന്തുണയായെന്നും മുഖ്യമന്ത്രി. എല്‍ഡിഎഫ് സര്‍ക്കാരിന്‍റെ ജനപിന്തുണ വര്‍ധിച്ചു. ദേശീയ രാഷ്ട്രീയത്തില്‍ ബിജെപിക്ക് തിരിച്ചടി ഉണ്ടാകുമെന്നും പിണറായി.

തിരുവനന്തപുരം: കേരളത്തിലെ ജനങ്ങള്‍ ആരുടേയും മുണ്ടിന്‍റെ കോന്തലയ്ക്ക് കെട്ടിയിട്ടവരല്ലെന്ന് സാമുദായിക സംഘടനകള്‍ മനസിലാക്കണമെന്ന് മുഖ്യമന്ത്രി പിണറായി വിജയന്‍. ജാതി മത സങ്കുചിത ശക്തികള്‍ക്ക് കേരളത്തിലെ മണ്ണില്‍ വേരോട്ടമില്ലെന്നും വര്‍ഗ്ഗീയ വിഷ വിത്ത് ഈ മണ്ണില്‍ വിളയില്ലെന്നും ഈ ഉപതെരഞ്ഞെടുപ്പ് തെളിയിച്ചുവെന്നും അദ്ദേഹം പറഞ്ഞു. എന്‍.എസ്.എസിന്‍റെ നിലപാടിനോട് പ്രതികരിക്കാനില്ലെന്നും അദ്ദേഹം കൂട്ടിച്ചേര്‍ത്തു. തിരുവനന്തപുരത്ത് ചേര്‍ന്ന വാര്‍ത്താ സമ്മേളനത്തില്‍ സംസാരിക്കുകയായിരുന്നു മുഖ്യമന്ത്രി.

എല്‍ഡിഎഫ് സര്‍ക്കാരിന്‍റെ ജനപിന്തുണയും ജനകീയതയും വര്‍ധിച്ചുവെന്നതിന്‍റെ തെളിവാണ് ഉപതെരഞ്ഞെടുപ്പ് ഫലം. കോണ്‍ഗ്രസ് നേതൃത്വം നല്‍കുന്ന യുഡിഎഫ് ശിഥിലമായി കഴിഞ്ഞുവെന്നും അദ്ദേഹം പറഞ്ഞു. സ്ഥാനാര്‍ഥി നിര്‍ണ്ണയത്തിലടക്കം പുറംകരാര്‍ എടുക്കുകയാണ് കോണ്‍ഗ്രസ് ചെയ്യുന്നത്. ജയിച്ച മണ്ഡലങ്ങളില്‍ പോലും വോട്ട് കണക്കില്‍ അവര്‍ക്ക് തിരിച്ചടിയുണ്ടായിട്ടുണ്ട്. ബിജെപിയേയും അവരുടെ വര്‍ഗ്ഗീയ അജണ്ടകളേയും ജനം തള്ളിക്കളഞ്ഞു. ത്രികോണ മത്സരം പോലും കാഴ്ച വയ്ക്കാൻ ബിജെപിക്ക് കഴിഞ്ഞില്ലെന്നും അദ്ദേഹം ആരോപിച്ചു. വട്ടിയൂര്‍കാവില്‍ വി.കെ. പ്രശാന്തിന്‍റെ വിജയം സംസ്ഥാന രാഷ്ട്രീയത്തിന്‍റെ പുതിയൊരു ദിശാസൂചികയാണെന്നും മുഖ്യമന്ത്രി കൂട്ടിച്ചേര്‍ത്തു. അരൂരിലെ പരാജയം പരിശോധിക്കും. ദേശീയ രാഷ്ട്രീയത്തിലും ബിജെപിക്ക് തിരിച്ചടി ഉണ്ടാവുന്നുണ്ട്. ഒറ്റ കക്ഷിഭരണമെന്ന ബിജെപി അജണ്ടയ്ക്ക് ഹരിയാനയിലും മഹരാഷ്ട്രയിലും തിരിച്ചടിയുണ്ടായെന്നും മുഖ്യമന്ത്രി പറഞ്ഞു.