തിരുവനന്തപുരം : ബഫർസോൺ വിഷയത്തിൽ ഏകകണ്ഠമായി പ്രമേയം പാസാക്കി നിയമസഭ. പ്രതിപക്ഷം ഉന്നയിച്ച രണ്ട് ഭേദഗതികൾ കൂടി ഉള്‍പ്പെടുത്തിയാണ് പ്രമേയം അംഗീകരിച്ചത്. വനം വന്യജീവി സങ്കേതങ്ങളുടെയും ദേശീയോദ്യാനങ്ങളുടെയും ഒരു കിലോമീറ്റർ ചുറ്റളവ് പരിസ്ഥിതി ലോല മേഖലയായിരിക്കണം എന്ന ഉത്തരവിൽ നിന്ന് ജനവാസ കേന്ദ്രങ്ങളെയും കൃഷിയിടങ്ങളെയും സ്ഥാപനങ്ങളെയും ഒഴിവാക്കണമെന്ന് പ്രമേയം ആവശ്യപ്പെടുന്നു.
വേണ്ടിവന്നാൽ വിഷയത്തില്‍ നിയമനിർമാണം നടത്തണമെന്നും, വനം മന്ത്രി എ കെ ശശീന്ദ്രന്‍ അവതരിപ്പിച്ച പ്രമേയം കേന്ദ്ര സർക്കാരിനോട് അഭ്യർഥിച്ചു. ഉത്തരവ് പൊതുതാത്പര്യത്തെ ബാധിക്കുന്നതും ജനജീവിതത്തെ ദുരിതത്തിലാക്കുന്നതുമാണെന്നും പ്രമേയത്തിൽ ചൂണ്ടിക്കാട്ടുന്നു.