തിരുവനന്തപുരം : നിയമസഭ തെരഞ്ഞെടുപ്പ് തോല്‍വിക്ക് പിന്നാലെ ബിജെപി സംസ്ഥാന ഘടകത്തില്‍ അഴിച്ചുപണി. സംസ്ഥാന പ്രസിഡന്‍റ് കെ.സുരേന്ദ്രനെ മാറ്റുമെന്ന് അഭ്യൂഹമുണ്ടായിരുന്നെങ്കിലും പ്രസിഡന്‍റായി സുരേന്ദ്രന്‍ തുടരും.
മുതിര്‍ന്ന നേതാക്കളും വൈസ് പ്രസിഡന്‍റുമാരുമായ ശോഭ സുരേന്ദ്രന്‍, എ.എന്‍ രാധാകൃഷ്‌ണന്‍, ജനറല്‍ സെക്രട്ടറിമാരായ എം.ടി.രമേശ്, ജോര്‍ജ് കുര്യന്‍ എന്നിവര്‍ക്കും മാറ്റമില്ല.
സംസ്ഥാന വക്താവായിരുന്ന ബി.ഗോപാലകൃഷ്‌ണന്‍, സംസ്ഥാന സെക്രട്ടറി സി.ശിവന്‍കുട്ടി, പി.രഘുനാഥ് എന്നിവരെ സംസ്ഥാന വൈസ് പ്രസിഡന്‍റുമാരാക്കി.
സംസ്ഥാന വൈസ് പ്രസിഡന്‍റായിരുന്ന ജി.രാമന്‍ നായരെ ദേശീയ സമിതിയിലേക്കും മറ്റൊരു സംസ്ഥാന വൈസ് പ്രസിഡന്‍റായിരുന്ന ടി.പി സിന്ധുമോളെ സംസ്ഥാന വക്താവായും മാറ്റി നിയമിച്ചു.