തിരുവനന്തപുരം: ബാലഭാസ്‌കറിന്‍റെ അപകടമരണത്തില്‍ തുടരന്വേഷണം ആവശ്യപ്പെട്ട് പിതാവ് ഉണ്ണി സമര്‍പ്പിച്ച ഹര്‍ജിയില്‍ വിധി ഇന്ന് (22-07-2022). തിരുവനന്തപുരം സി.ജെ.എം കോടതിയാണ് വിധി പറയുന്നത്. സ്വര്‍ണക്കടത്ത് കേസിലെ പ്രതികളും സുഹൃത്തുക്കളും ചേര്‍ന്ന് ബാലഭാസ്‌കറിനെ കൊലപ്പെടുത്തിയതാണെന്നും, മരണത്തില്‍ സി.ബി.ഐ റിപ്പോര്‍ട്ട് തള്ളണമെന്നുമാണ് ഹര്‍ജിയിലെ ആവശ്യം.
വാദത്തിനിടെ ബാലഭാസ്‌കറിന്‍റെ ഫോണ്‍ രേഖകള്‍ സി.ബി.ഐ പരിശോധിച്ചില്ലെന്ന് രക്ഷിതാക്കള്‍ ചൂണ്ടിക്കാട്ടിയിരുന്നു. വയലിനിസ്‌റ്റിന്‍റെ മരണത്തിന് ശേഷം ഈ ഫോണ്‍ ഉപയോഗിച്ചത് സുഹൃത്തായ പ്രകാശന്‍ തമ്പിയാണ്. സ്വര്‍ണകള്ളക്കടത്ത് കേസില്‍ പ്രതിയായ പ്രകാശന്‍ തമ്പിയ്‌ക്ക് അപകടത്തിന് പിന്നില്‍ പങ്കുണ്ടെന്നാണ് ഉയരുന്ന മറ്റൊരു ആരോപണം.