കെ-റെയിൽ സാമ്പത്തികമായും സാങ്കേതികമായും മുന്നോട്ട് പോകില്ല; ബദൽ സംവാദത്തിൽ അലോക് കുമാർ വർമ

മുൻപരിചയം ഇല്ലാത്തവരും അവിദഗ്‌ധരുമാണ് അത് തയാറാക്കിയത്. 50 ദിവസം കൊണ്ടാണ് അന്തിമ സാധ്യത പഠന റിപ്പോർട്ട് തയാറാക്കിയത്. അടിയന്തരമായി ഡി.പി.ആർ പിൻവലിക്കണമെന്നും ബദൽ സംവാദത്തിൽ അലോക് കുമാർ വർമ പറഞ്ഞു.

തിരുവനന്തപുരം:സാമ്പത്തികമായും സാങ്കേതികമായും മുന്നോട്ട് പോകാൻ കഴിയാത്ത പദ്ധതിയാണ് കെ-റെയിലെന്ന് ബദൽ സംവാദത്തിൽ അലോക് കുമാർ വർമ. സിൽവർലൈൻ യാഥാർഥ്യമാക്കാൻ കൺസൾട്ടിങ് കമ്പനിയായ സിസ്ട്രയിൽ നിന്നും കെ-റെയിലിൽ നിന്നും പദ്ധതി മോചനം നേടണം. ഡി.പി.ആറിലെ അപാകതകൾ ചൂണ്ടികാട്ടി ചീഫ് സെക്രട്ടറിക്ക് മെയിൽ അയച്ചിരുന്നു. എന്നാൽ മറുപടി ലഭിച്ചില്ലെന്നും അലോക് കുമാർ വർമ പറഞ്ഞു.

സിൽവർലൈൻ പദ്ധതിക്ക് സ്റ്റാൻഡേർഡ് ഗേജ് തെരഞ്ഞെടുത്തതാണ് ഒന്നാമത്തെ അപാകത. അലൈൻമെന്‍റിന്‍റെ 93 ശതമാനവും ഉറപ്പില്ലാത്ത ഭൂമിയിലാണെന്നും അദ്ദേഹം ചൂണ്ടിക്കാട്ടി. സ്റ്റോപ്പുകൾ പലതും പ്രധാന നഗരങ്ങൾക്ക് പുറത്താണ് എന്നതാണ് രണ്ടാമത്തെ അപാകത. തന്‍റെ സാധ്യതാപഠന റിപ്പോർട്ടാണ് അവസാനത്തേത്. ഇതിനുശേഷം മറ്റ് പഠനങ്ങൾ നടന്നിട്ടില്ലെന്നും അലോക് കുമാർ വർമ ഇന്ന് നടന്ന ബദൽ സംവാദത്തിൽ വ്യക്തമാക്കി.

മുൻപരിചയം ഇല്ലാത്തവരും അവിദഗ്‌ധരുമാണ് അത് തയാറാക്കിയത്. 50 ദിവസം കൊണ്ടാണ് അന്തിമ സാധ്യത പഠന റിപ്പോർട്ട് തയാറാക്കിയത്. നീതി ആയോഗ് പദ്ധതി ചെലവ് ഇരട്ടിയാകും എന്ന് പറഞ്ഞിട്ടും കെ-റെയിൽ മറുപടി നൽകിയില്ല. അടിയന്തരമായി ഡി.പി.ആർ പിൻവലിക്കണമെന്നും അദ്ദേഹം പറഞ്ഞു.

ഇന്ന് നടന്ന ബദല്‍ സംവാദത്തില്‍ മുതിർന്ന മാധ്യമപ്രവർത്തകൻ എം.ജി രാധാകൃഷ്‌ണൻ ആണ് മോഡറേറ്റർ. പദ്ധതിയെ എതിർക്കുന്നവരുടെ നിരയിൽ അലോക് വർമയ്‌ക്ക് പുറമേ ആർ.വി.ജി മേനോൻ, ശ്രീധർ രാധാകൃഷ്‌ണൻ, ജോസഫ് സി. മാത്യു എന്നിവരുമുണ്ട്. അനുകൂലിക്കുന്നവരുടെ നിരയിൽ കുഞ്ചെറിയ പി. ഐസക്, എസ്.എൻ രഘുചന്ദ്രൻ നായർ എന്നിവരാണുള്ളത്.