തിരുവനന്തപുരം: എ.കെ.ജി സെന്‍റര്‍ ആക്രമണ കേസിൽ കസ്റ്റഡിയിലെടുത്ത യൂത്ത് കോൺഗ്രസ് നേതാവ് ജിതിന്‍റെ കസ്റ്റഡി അപേക്ഷയും ജാമ്യ അപേക്ഷയും കോടതി ഇന്ന്(സെപ്റ്റംബര് 23) പരിഗണിക്കും. അതേസമയം ആക്രമണം നടന്ന ദിവസം ഉപയോഗിച്ച ഫോണും സ്‌കൂട്ടറും ക്രൈം ബ്രാഞ്ചിന് കണ്ടെത്താനാകാത്തത് വെല്ലുവിളി ഉയർത്തും. ഗൂഢാലോചനയിൽ കൂടുതൽ പേർ ഉൾപ്പെട്ടിരിക്കുന്നതായാണ് പൊലീസ് പറയുന്നത്.
നാല് ദിവസത്തെ കസ്റ്റഡി അപേക്ഷയാണ് ക്രൈം ബ്രാഞ്ച് നല്‍കിയത്. സ്ഫോടക വസ്‌തുവെറിഞ്ഞത് താനാണെന്ന് ജിതിന്‍ കുറ്റസമ്മതം നടത്തിയിട്ടുണ്ടെന്നാണ് റിമാൻഡ് റിപ്പോര്‍ട്ടില്‍ ക്രൈം ബ്രാഞ്ച് പറയുന്നത്. യൂത്ത് കോൺഗ്രസിന്‍റെ പ്രാദേശിക നേതൃത്വത്തിന്‍റെ കൂടി അറിവോടെയാണ് പ്രതി എകെഎജി സെന്‍റർ ആക്രമിച്ചതെന്നും റിമാൻഡ് റിപ്പോർട്ടിലുണ്ട്.