'സംസ്ഥാനത്തെ മഴക്കെടുതിയില്‍ മരിച്ചത് 42 പേര്‍'; 6 പേരെ കൂടി കണ്ടെത്താനുണ്ടെന്ന് മുഖ്യമന്ത്രി

ദുരിതാശ്വാസ ക്യാമ്പുകളില്‍ 3859 കുടുംബങ്ങളാണ് കഴിയുന്നതെന്നും മുഖ്യമന്ത്രി പിണറായി വിജയന്‍.

തിരുവനന്തപുരം:സംസ്ഥാനത്തെ മഴക്കെടുതിയില്‍ ബുധനാഴ്ച വരെ 42 പേര്‍ മരിച്ചെന്ന് മുഖ്യമന്ത്രി പിണറായി വിജയന്‍. ഉരുള്‍പൊട്ടലില്‍ മരിച്ച 19 പേരുടെ മൃതദേഹങ്ങള്‍ കണ്ടെത്തി. ആറുപേരെയാണ് ഇനി കണ്ടെത്താനുള്ളതെന്നും അദ്ദേഹം പറഞ്ഞു.

ദുരിതബാധിതര്‍ക്ക് സാധ്യമായ എല്ലാ സഹായവും നല്‍കും. 304 ദുരിതാശ്വാസ ക്യാമ്പുകളിലായി 3859 കുടുംബങ്ങളാണ് കഴിയുന്നത്. ക്യാമ്പുകളില്‍ കൊവിഡ് പകരാതിരിക്കാന്‍ പ്രത്യേകം ജാഗ്രത പാലിക്കണം. ക്യാമ്പില്‍ പുറത്ത് നിന്നുള്ളവരുടെ സമ്പര്‍ക്കം ഒഴിവാക്കണം. ആരോഗ്യപ്രവര്‍ത്തകരുടെ സേവനം ക്യാമ്പുകളില്‍ ഉറപ്പാക്കും.

കൊവിഡ് പകരാതിരിക്കാന്‍ ക്യാമ്പുകളില്‍ ആന്‍റിജന്‍ പരിശോധന നടത്തും. മഴക്കെടുതികളില്‍ മരിച്ചവര്‍ക്കുമുള്ള ധനസഹായം എത്രയും പെട്ടന്ന് കൈക്കൊള്ളാനുള്ള നടപടികള്‍ സ്വീകരിക്കാന്‍ വകുപ്പുകള്‍ക്ക് നിര്‍ദേശം നല്‍കി. കൂടാതെ തകര്‍ന്ന വീടുകളുടെയും റോഡുകളുടെയും പാലങ്ങളുടെയും കണക്കെടുപ്പ് പൂര്‍ത്തീകരിച്ച് എത്രയും പെട്ടന്ന് ധനസഹായം നല്‍കാനും നിര്‍ദേശിച്ചതായി മുഖ്യമന്ത്രി പറഞ്ഞു.