പത്തനംതിട്ട:തനിക്ക് കൊവിഡ് ബാധിച്ചുവെന്ന തരത്തില്‍ മാധ്യമങ്ങളില്‍ പ്രചരിക്കുന്ന വാര്‍ത്ത തെറ്റാണെന്ന് ആരോഗ്യമന്ത്രി വീണ ജോര്‍ജ്. 'കുറച്ച് ദിവസങ്ങളായി പനി ഉണ്ടായിരുന്നു. എന്നാല്‍ രണ്ടുതവണ ആർ.ടി.പി.സി.ആർ പരിശോധന നടത്തിയപ്പോഴും കൊവിഡ് നെഗറ്റീവ് ആയിരുന്നെന്നും' മന്ത്രി ഫേസ്‌ബുക്ക് പോസ്‌റ്റിലൂടെ അറിയിച്ചു.
'നിജസ്ഥിതി തിരക്കാതെ മാധ്യമങ്ങള്‍ പ്രചരിപ്പിക്കുന്ന വാര്‍ത്ത തെറ്റാണ്. തെറ്റായ വാര്‍ത്ത മറ്റുള്ളവര്‍ക്കും ബുദ്ധിമുട്ടാകും എന്നതിനാലാണ് ഇക്കാര്യം അറിയിക്കുന്നതെന്നും' മന്ത്രി കുറിച്ചു. മന്ത്രി വീണ ജോര്‍ജിനും പത്തനംതിട്ട ജില്ല കലക്‌ടര്‍ ദിവ്യ എസ് അയ്യര്‍ക്കും കൊവിഡ് ബാധിച്ചുവെന്നായിരുന്നു വാര്‍ത്ത. ഇരുവരും ഒന്നിച്ച് പൊതുപരിപാടിയില്‍ പങ്കെടുത്തിരുന്നു.