പത്തനംതിട്ട: പോപ്പുലര്‍ ഫ്രണ്ട് ഹര്‍ത്താലിനിടെ പത്തനംതിട്ടയില്‍ കെഎസ്ആര്ടിസി ബസിന് നേരേ കല്ലെറിഞ്ഞ കേസില്‍ പിഎഫ്ഐ പ്രവർത്തകൻ അറസ്റ്റിൽ. പത്തനംതിട്ട കുമ്പഴ ഭാഗത്ത്‌ കുലശേഖരപതി സ്വദേശി ഷഫീഖാണ് (33) അറസ്റ്റിലായത്. ഹർത്താൽ ദിവസം കുമ്പഴ റോഡില്‍ കണ്ണങ്കര ജയിലിന് സമീപമാണ് പ്രതി കെഎസ്ആര്ടിസി ബസിന് കല്ലെറിഞ്ഞത്.
പത്തനംതിട്ടയില്‍ നിന്ന് തിരുവനന്തപുരം കളിയിക്കാവിള ഭാഗത്തേക്ക് സര്‍വിസ് നടത്തിയ ബസിന് നേരെ ഇടവഴിയിലുടെ ഓടിയെത്തിയ ഹര്‍ത്താൽ അനുകൂലികള്‍ കല്ലെറിഞ്ഞ ശേഷം രക്ഷപ്പെടുകയായിരുന്നു. കൃത്യത്തില്‍ പങ്കെടുത്ത മറ്റ് പ്രതികളെയും തിരിച്ചറിഞ്ഞതായും പൊലീസ് പറഞ്ഞു.