സംസ്ഥാനത്ത് വീണ്ടും ഭക്ഷ്യ വിഷബാധ; ചന്ദനപ്പള്ളി സ്‌കൂളിലെ 10 കുട്ടികൾ ചികിത്സ തേടി

സ്‌കൂളിൽ രാവിലെ എത്തിച്ച ഭക്ഷണം കുട്ടികൾക്ക് വിതരണം ചെയ്‌തത് വൈകിട്ടാണെന്നും ഇത് കഴിച്ച വിദ്യാർഥികൾക്ക് ഇന്നലെ മുതൽ ശാരീരികാസ്വാസ്ഥ്യം അനുഭവപ്പെടുകയായിരുന്നുവെന്നാണ് വിവരം

പത്തനംതിട്ട: ചന്ദനപ്പിള്ളിയിലെ സ്‌കൂളിൽ വാർഷികാഘോഷത്തിന് ചിക്കൻ ബിരിയാണി കഴിച്ച പത്ത് കുട്ടികൾക്ക്‌ ഭക്ഷ്യ വിഷബാധ. പത്ത് കുട്ടികളും ആശുപത്രിയിൽ ചികിത്സ തേടി. ആരുടെയും നില ഗുരുതരമല്ല. ചന്ദനപ്പള്ളി റോസ് ഡെയില്‍ സ്‌കൂളിലെ വിദ്യാര്‍ഥികള്‍ക്കാണ് ഭക്ഷ്യവിഷബാധയേറ്റത്.

ചിക്കൻ ബിരിയാണി കഴിച്ച കുട്ടികൾക്കാണ് അസ്വസ്ഥത ഉണ്ടായത്. വെള്ളിയാഴ്‌ച നടന്ന സ്‌കൂൾ വാർഷികാഘോഷത്തിനാണ് ബിരിയാണി വിതരണം ചെയ്‌തത്. വെള്ളിയാഴ്‌ച രാവിലെ 11 മണിക്ക് സ്‌കൂളില്‍ എത്തിച്ച ഭക്ഷണം കുട്ടികള്‍ക്ക് നല്‍കിയത് വൈകിട്ട് ആറ് മണിയ്‌ക്കാണെന്നാണ് വിവരം.

വൈകിട്ട് വരെ സ്‌കൂള്‍ അധികൃതര്‍ ബിരിയാണി കൊടുക്കാതെ പിടിച്ചു വച്ചുവെന്ന് രക്ഷിതാക്കൾ പറഞ്ഞു. കൊടുമണ്ണിലുള്ള കാരമല്‍ എന്ന ഹോട്ടലില്‍ നിന്നാണ് സ്‌കൂളില്‍ ബിരിയാണി എത്തിച്ചത്. ഹോട്ടലില്‍ പരിശോധന നടത്തുമെന്ന് ഫുഡ് സേഫ്‌റ്റി ഉദ്യോഗസ്ഥര്‍ അറിയിച്ചു. ഇതിനിടെ ഭക്ഷ്യസുരക്ഷ പരിശോധനയിൽ ജില്ലയിലെ രണ്ട് ഹോട്ടലുകള്‍ അടച്ചുപൂട്ടി.

അടൂര്‍ ബൈപ്പാസിലെ അല്‍ ഫറൂജ്, റാന്നി പറപ്പെട്ടിയിലെ ശ്രീശാസ്‌ത ടീ ഷോപ്പ് എന്നിവയാണ് പൂട്ടിയത്. അഞ്ച് ഹോട്ടലുകള്‍ക്ക് പിഴ ചുമത്തിയിട്ടുണ്ട്.