പത്തനംതിട്ട: റോഡിലൂടെ നടന്നു പോകുകയായിരുന്ന യുവതിയെ അടിച്ചു വീഴ്ത്തിയ ശേഷം ബൈക്കിലെത്തിയ സംഘം സ്വർണമാല പൊട്ടിച്ചു കടന്നു. തിരുവല്ല മാഞ്ഞാടി പൊയ്‌കയിൽ വീട്ടിൽ ഷീബ സന്തോഷിന്‍റെ നാലര പവന്‍റെ മാലയാണ് ബൈക്കിലെത്തിയ രണ്ടംഗ സംഘം കവര്‍ന്നത്.
മഞ്ഞാടി-പുതിരിക്കാട്ട് മല റോഡില്‍ ശനിയാഴ്‌ച വൈകീട്ടായിരുന്നു സംഭവം. പുതുശ്ശേരി സപ്ലൈക്കോയിലെ ജീവനക്കാരിയായ ഷീബ ജോലി കഴിഞ്ഞ് ബസിറങ്ങി വീട്ടിലേക്ക് നടന്നു പോകുകയായിരുന്നു. മഴക്കോട്ട് ധരിച്ച് ബൈക്കിലെത്തിയ രണ്ടംഗ സംഘമാണ് ഷീബയെ അടിച്ചു വീഴ്ത്തി മാല പൊട്ടിച്ചു കടന്നത്.