പത്തനംതിട്ട : അടൂരിൽ യുവാവിനെ കാറിടിച്ച് കൊലപ്പെടുത്താൻ ശ്രമിച്ചതായി പരാതി. സംഭവത്തിൽ ഗുരുതരമായി പരിക്കേറ്റ അടൂർ വടക്കടത്തുകാവ് കിണറുവിളയിൽ വീട്ടിൽ ബിജോയ്‌ തോമസിനെ തിരുവനന്തപുരത്തെ സ്വകാര്യ ആശുപത്രിയിൽ പ്രവേശിപ്പിച്ചു.
ചൊവ്വാഴ്‌ച രാത്രി 11.30ഓടെ അടൂർ ജനറൽ ആശുപത്രിക്ക് മുന്നിലെ റോഡിലായിരുന്നു സംഭവം. ബിജോയിയുടെ മൊഴിയുടെ അടിസ്ഥാനത്തിൽ അടൂർ പൊലീസ് കേസെടുത്ത് അന്വേഷണം ആരംഭിച്ചു.സംഭവത്തിന്‍റെ സിസിടിവി ദൃശ്യങ്ങളും ശേഖരിച്ചിട്ടുണ്ട്. വധ ശ്രമത്തിനാണ് കേസ്.
സംഭവത്തെ കുറിച്ച് പൊലീസ് പറയുന്നതിങ്ങനെ
ചൊവ്വാഴ്‌ച രാത്രി 10.30ഓടെ അടൂർ ഹൈസ്‌കൂൾ ജംഗ്ഷനിൽ ഓട്ടോറിക്ഷ മറിഞ്ഞ് അപകടമുണ്ടായി. അപകടത്തിൽപ്പെട്ടവരെ ബിജോയ്‌ ജനറൽ ആശുപത്രിയിൽ എത്തിച്ച ശേഷം ആശുപത്രിക്ക് മുന്നിലെ റോഡരികിൽ നിൽക്കുകയായിരുന്നു.
ഈ സമയം ഈ വഴി അമിത വേഗത്തിലെത്തിയ ഒരു കാർ ബിജോയിയെ ഇടിച്ച് തെറിപ്പിക്കുകയായിരുന്നു. മുന്നോട്ടു പോയ കാർ വീണ്ടുമെത്തി ഇടിക്കാനായി ശ്രമിച്ചെങ്കിലും സ്ഥലത്തുണ്ടായിരുന്നവർ റോഡിൽ വീണുകിടന്ന ബിജോയിയെ എടുത്തുമാറ്റുകയായിരുന്നു.