നേട്ടങ്ങളെ കരിവാരിത്തേക്കാൻ പ്രതിപക്ഷം ശ്രമിക്കുന്നു: പിണറായി വിജയന്‍

കോന്നി മെഡിക്കൽ കോളജ് വീഡിയോ കോൺഫറൻസിലൂടെ ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി

പത്തനംതിട്ട: നേട്ടങ്ങളെ കരിവാരിത്തേക്കാൻ പ്രതിപക്ഷം ബോധപൂർവം ശ്രമിക്കുകയാണെന്ന് മുഖ്യമന്ത്രി പിണറായി വിജയൻ. നാടിന് ഗുണം ഉണ്ടാകുന്നത് ഇല്ലാതാക്കാനുള്ള ശ്രമമാണ് നടത്തുന്നത്. ലൈഫ് മിഷൻ പദ്ധതിയിൽ ഉൾപ്പെടുത്തി രണ്ടേകാൽ ലക്ഷം വീടുകളാണ് സർക്കാർ പൂർത്തിയാക്കിയത്. ആ നേട്ടങ്ങളെ കരിവാരിത്തേച്ച് കാട്ടാനുള്ള ശ്രമമാണ് പ്രതിപക്ഷത്തിൻ്റെ ഭാഗത്ത് നിന്ന് ഉണ്ടാകുന്നതെന്നും മുഖ്യമന്ത്രി പറഞ്ഞു. കോന്നി മെഡിക്കൽ കോളജ് വീഡിയോ കോൺഫറൻസിലൂടെ ഉദ്ഘാടനം ചെയ്യുകയായിരുന്നു മുഖ്യമന്ത്രി.

കോന്നി മെഡിക്കൽ കോളജ് ഉദ്ഘാടന ചടങ്ങ് ബഹിഷ്ക്കരിച്ച യുഡിഎഫിനെയും മുഖ്യമന്ത്രി കുറ്റപ്പെടുത്തി. നാലര വർഷം കൊണ്ട് കേരളത്തിലെ ആരോഗ്യ മേഖലയ്ക്ക് വലിയ വളർച്ച ഉണ്ടായി. ആശുപത്രികളെല്ലാം മെച്ചപ്പെട്ടു. കിഫ്ബി ഫണ്ട് ഉപയോഗിച്ച് മെഡിക്കൽ കോളജിൻ്റെ രണ്ടാം ഘട്ട പ്രവർത്തനം ഉടൻ ആരംഭിക്കുമെന്നും മുഖ്യമന്ത്രി പറഞ്ഞു.ഒരു ദിവസത്തെ വാർത്ത കണ്ട് വിധി കൽപ്പിക്കുന്നവരല്ല ജനങ്ങൾ. അവർക്ക് ജീവിതാനുഭവങ്ങളും നാടിൻ്റെ അനുഭവമുണ്ട്. സർക്കാർ എങ്ങനെയാണ് കാര്യങ്ങൾ നിർവഹിക്കുന്നതെന്ന് കാണുന്നുണ്ട്. തെറ്റായ കാര്യങ്ങൾ സൃഷ്ടിക്കാനുള്ള ശ്രമമാണ് നടക്കുന്നത്. ശരിയായ കാര്യങ്ങൾ നാടിന് മുന്നിൽ അവതരിപ്പിക്കാൻ സമ്മതിക്കില്ലെന്ന മാനസിക അവസ്ഥയുള്ള ചിലരുണ്ട്. അത്തരക്കാരാണ് വിവാദം ഉണ്ടാക്കുന്നതെന്നും മുഖ്യമന്ത്രി പറഞ്ഞു.ഉദ്ഘാടന ചടങ്ങിൽ ആരോഗ്യ മന്ത്രി കെകെ ഷൈലജ ടീച്ചർ അധ്യക്ഷത വഹിച്ചു. വനം വകുപ്പ് മന്ത്രി കെരാജു മുഖ്യ പ്രഭാഷണം നടത്തി. ജില്ല കലക്ടർ പിബി നൂഹ്, എംഎൽഎ മാർ ഗ്രാമപഞ്ചായത്ത് അംഗങ്ങൾ, ബ്ലോക്ക് പഞ്ചായത്തു അംഗങ്ങൾ തുടങ്ങിയവർ പങ്കെടുത്തു. കൊവിഡ് മാനദണ്ഡങ്ങൾ പാലിച്ചാണ് ഉദ്ഘാടന ചടങ്ങുകൾ നടന്നത്.