എംജി സർവകലാശാല അഴിമതി; ജൂഡീഷ്യൽ അന്വേഷണം വേണമെന്ന് എം. ടി. രമേശ്

കേസിൽ മന്ത്രി കെ. ടി. ജലീലിനും അദ്ദേഹത്തിന്‍റെ പ്രൈവറ്റ് സെക്രട്ടറിക്കും പങ്കുണ്ടെന്നും കേസ് സിബിഐ ഏറ്റെടുക്കണമെന്നും ബിജെപി സംസ്ഥാന ജനറല്‍ സെക്രട്ടറി എം. ടി. രമേശ് പറഞ്ഞു.

പത്തനംതിട്ട : സിൻഡിക്കേറ്റുകൾ പിരിച്ചു വിട്ട് ജൂഡീഷ്യൽ അന്വേഷണം നടത്തണമെന്ന് ബിജെപി സംസ്ഥാന ജനറല്‍ സെക്രട്ടറി എം. ടി. രമേശ്. എംജി സർവകലാശാലയിലെ മാർക്ക് ദാനത്തിൽ മന്ത്രി കെ. ടി. ജലീലിനും അദ്ദേഹത്തിന്‍റെ പ്രൈവറ്റ് സെക്രട്ടറിക്കും പങ്കുണ്ടെന്ന് എം. ടി. രമേശ് ആരോപിച്ചു.

വലിയ അഴിമതിയാണ് സര്‍വകലാശാലകളില്‍ നടന്നിരിക്കുന്നത്. അതുകൊണ്ട് തന്നെ എല്ലാ സിൻഡിക്കേറ്റുകളും പിരിച്ചു വിട്ട് അന്വേഷണം ആരംഭിക്കണം. പരീക്ഷ സമ്പ്രദായത്തിന്‍റെ വിശ്വാസ്യത തകർന്നുവെന്നും ഇതിനു പിന്നിലുള്ള എല്ലാ ആരോപണങ്ങളും സിബിഐ അന്വേഷിക്കണമെന്നും അദ്ദേഹം ആവശ്യപ്പെട്ടു.