ഓണാഘോഷത്തിനിടെ സംഘര്‍ഷം; സംഘാടകരെ കുത്തി പരിക്കേല്‍പ്പിച്ച രണ്ടുപേര്‍ പിടിയില്‍

പത്തനംതിട്ട ചെന്നീർക്കരയിലാണ് സംഭവം. ചെന്നീർക്കര നല്ലാനിക്കുന്ന് ഡ്രീംസ് സ്പോർട്‌സ് ക്ലബ്ബിന്‍റെ ആഭിമുഖ്യത്തിൽ നടന്ന ഓണാഘോഷത്തിന് ഇടക്കാണ് സംഘര്‍ഷമുണ്ടായത്. സംഘാടകരായ 4 പേരെ അക്രമി സംഘം കുത്തി പരിക്കേല്‍പ്പിച്ചു

പത്തനംതിട്ട:ചെന്നീർക്കരയിൽ ക്ലബ്ബിന്‍റെ ആഭിമുഖ്യത്തിൽ നടന്ന ഓണാഘോഷത്തിനിടെ ഉണ്ടായ ആക്രമണത്തിൽ സംഘാടകരായ 4 പേർക്ക് കുത്തേറ്റു. 3 പേരുടെ പരിക്ക് ഗുരുതരമാണ്. ചെന്നീർക്കര നല്ലാനിക്കുന്ന് ഡ്രീംസ് സ്പോർട്‌സ് ക്ലബ്ബിന്‍റെ ആഭിമുഖ്യത്തിൽ തിരുവോണദിവസം നടന്ന പരിപാടിക്കിടെയാണ് സംഘർഷമുണ്ടായത്.

സംഭവത്തില്‍ ആറാം പ്രതി പാണ്ടനാട് കീഴ്‌വൻമൂഴിയിൽ പൂപ്പുറത്ത് തകിടിയിൽ വീട്ടിൽ നിധീഷ് കുമാർ (26), ഏഴാം പ്രതി പാണ്ടനാട് കീഴ്‌വൻമൂഴിയിൽ വാലിയേഴത്ത് വീട്ടിൽ അഖിൽ വി എസ് (22) എന്നിവരെ പൊലീസ് അറസ്റ്റ് ചെയ്‌തു. 7 അംഗ സംഘമാണ് ആക്രമണം നടത്തിയത്. 5 പേര്‍ ഒളിവിലാണ്.

ചെന്നീർക്കര ഇലവുംതിട്ട നല്ലാനിക്കുന്ന് പ്ലാവ് നിൽക്കുന്നതിൽ വീട്ടിൽ സന്തോഷ്‌കുമാറിന്‍റെ മകൻ ആരോമൽ, ഇയാളുടെ ചേട്ടൻ അഖിൽ, സുഹൃത്തുക്കളായ വിജേഷ്, സുബിൻ എന്നിവർക്കാണ് കുത്തേറ്റത്. ആരോമൽ, അഖിൽ, വിജേഷ് എന്നിവർക്ക് നെഞ്ചിലും വയറ്റിലും തുടയിലുമാണ് പരിക്ക്.

ഇവരുടെ പരിക്ക് ഗുരുതരമാണ്. ഇവർ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലാണ്. അക്രമി സംഘം പരിപാടി അലങ്കോലപ്പെടുത്താന്‍ ശ്രമിച്ചത് ചോദ്യം ചെയ്‌തതിനാണ് സംഘാടകരെ ആക്രമിച്ചത്. ഒളിവിലുള്ള പ്രതികള്‍ക്കായി പൊലീസ് അന്വേഷണം ഊര്‍ജിതമാക്കി.