നഴ്‌സ് വേഷത്തില്‍ എത്തി, പ്രസവിച്ചുകിടന്ന യുവതിയെ വായു കുത്തിവച്ച്‌ കൊലപ്പെടുത്താന്‍ ശ്രമം; ഭര്‍ത്താവിന്‍റെ പെണ്‍സുഹൃത്ത് പിടിയില്‍

പ്രസവ ചികിത്സയ്‌ക്കായി പരുമലയിലെ സ്വകാര്യ ആശുപത്രിയിൽ പ്രവേശിപ്പിച്ച യുവതിയെയാണ് ഭർത്താവിന്‍റെ പെൺസുഹൃത്ത് കൊലപ്പെടുത്താൻ ശ്രമിച്ചത്. സംഭവത്തിൽ ഭർത്താവിന്‍റെ സുഹൃത്തായ യുവതിയെ പൊലീസ് അറസ്റ്റ് ചെയ്‌തു. ഇന്നലെ വൈകിട്ട് മൂന്ന് മണിയോടെയാണ് സംഭവം.

പത്തനംതിട്ട : പ്രസവിച്ചുകിടന്ന യുവതിയെ നഴ്‌സിന്‍റെ വേഷത്തിലെത്തി വായു കുത്തിവച്ചു കൊലപ്പെടുത്താൻ ശ്രമം. കായംകുളം കരിയിലക്കുളങ്ങര സ്വദേശി അരുണിന്‍റെ ഭാര്യ സ്നേഹയെ (24) കൊലപ്പെടുത്താൻ ശ്രമിച്ച യുവതിയെ പുളിക്കീഴ് പൊലീസ് അറസ്റ്റ് ചെയ്‌തു. കായംകുളം പുല്ലുകുളങ്ങര സ്വദേശി അപ്പുവിന്‍റെ ഭാര്യ അനുഷ (25) ആണ് പിടിയിലായത്.

സ്നേഹയുടെ ഭർത്താവ് അരുണിന്‍റെ സുഹൃത്താണ് പിടിയിലായ അനുഷ. ആശുപത്രി ജീവനക്കാർക്ക് തോന്നിയ സംശയമാണ് സ്നേഹയുടെ ജീവൻ രക്ഷിക്കുന്നതിൽ നിർണായകമായത്. പരുമലയിലെ സ്വകാര്യ ആശുപത്രിയിൽ ഇന്നലെ വൈകിട്ട് മൂന്ന് മണിയോടെയാണ് സംഭവം.

നാല് ദിവസം മുൻപാണ് സ്നേഹയെ പ്രസവത്തിനായി ആശുപത്രിയില്‍ പ്രവേശിപ്പിച്ചത്. ഇന്നലെ വൈകുന്നേരം അനുഷ നഴ്‌സിന്‍റെ വേഷത്തില്‍ ആശുപത്രിയില്‍ എത്തി. പ്രസവശേഷം ചികിത്സയിലായിരുന്ന സ്നേഹയുടെ മുറിയിലെത്തിയ അനുഷ ഒഴിഞ്ഞ സിറി‌ഞ്ച് കൊണ്ട് സ്നേഹയുടെ ഞരമ്പിലേക്ക് വായു കുത്തി വച്ച് കൊലപ്പെടുത്താൻ ശ്രമിക്കുകയായിരുന്നു. രക്ത ധമനിയിലേക്ക് വായു കടന്നാൽ സംഭവിക്കാവുന്ന അപകടം മനസിലാക്കിയാണ് ഫാർമസി പഠനം കഴിഞ്ഞ അനുഷ ഈ കൊടും ക്രൂരത നടത്തിയതെന്നാണ് വിവരം.

ഇവർ കൃത്യം നടത്തിയ ശേഷം മുറിയിൽ നിന്ന് പുറത്തിറങ്ങുമ്പോൾ ആശുപത്രിയിലെ നഴ്‌സുമാർ കാണുകയും സംശയം തോന്നി തടഞ്ഞു വയ്ക്കുകയുമായിരുന്നു. തുടർന്ന് ആശുപത്രി അധികൃതർ പൊലീസിൽ വിവരം അറിയിച്ചു. പുളിക്കീഴ്‌ പൊലീസ് സ്ഥലത്തെത്തി ഇവരെ കസ്റ്റഡിയിൽ എടുക്കുകയായിരുന്നു.

ഞരമ്പ് ലഭിക്കാൻ എന്ന വ്യാജേന നാലോളം തവണ ഇവർ കുത്തിയെന്നാണ് സൂചന. വായു കുത്തിവച്ചതിന് പിന്നാലെ സ്നേഹയ്ക്ക് ഹൃദയാഘാതമുണ്ടായെങ്കിലും നിലവിൽ ആരോഗ്യ നില തൃപ്‌തികരമാണെന്നാണ് ആശുപത്രി അധികൃതർ നൽകുന്ന വിവരം. കസ്റ്റഡിയിലെടുത്ത ഇവരെ പൊലീസ് വിശദമായി ചോദ്യം ചെയ്‌ത് വരികയാണ്.

കൃത്യം നടത്തിയത് അരുണിനൊപ്പം ജീവിക്കാൻ : ആക്രമിക്കപ്പെട്ട സ്‌നേഹയുടെ ഭര്‍ത്താവ് അരുണിനൊപ്പം ജീവിക്കാനാണ് കൊലപാതക ശ്രമം നടത്തിയതെന്നാണ് അനുഷ പൊലീസിന് നൽകിയ മൊഴി. അതേസമയം ചോദ്യം ചെയ്യാനായി അരുണിനെ പൊലീസ് വിളിപ്പിച്ചിട്ടുണ്ട്. അരുണിന്‍റെ സഹപാഠിയുടെ സഹോദരിയാണ് പ്രതിയായ അനുഷ. അരുണുമായി അനുഷക്ക് അടുപ്പമുണ്ടായിരുന്നതായാണ് പൊലീസിൽ നിന്നും ലഭിക്കുന്ന വിവരം.

അനുഷയും അരുണും തമ്മിലുള്ള വാട്‌സ്‌ആപ്പ് ചാറ്റുകള്‍ പൊലീസ് ശേഖരിച്ചിട്ടുണ്ട്. അതേസമയം സ്‌നേഹക്ക് മൂന്ന് തവണ ഇഞ്ചക്ഷൻ എടുത്തുവെന്നാണ് പൊലീസ് നൽകുന്ന വിവരം. സംഭവത്തിന്‌ പിന്നിൽ കൃത്യമായ ഗൂഢാലോചനയുണ്ടെന്നും പൊലീസ് വ്യക്‌തമാക്കി

ആശുപത്രി വിവരങ്ങള്‍ അരുണ്‍ അനുഷയുമായി പങ്കുവച്ചിരുന്നുവെന്നാണ് ലഭിക്കുന്ന വിവരം. കൊലപാതക ശ്രമത്തില്‍ അരുണിന് പങ്കുണ്ടോ എന്നത് സ്ഥിരീകരിക്കാനായിട്ടില്ല. ഇത് സംബന്ധിച്ച് കൂടുതൽ അന്വേഷണം ഉണ്ടാകുമെന്ന് അധികൃതർ അറിയിച്ചു.

ആശുപത്രിയിൽ ഒപ്പമുണ്ടായിരുന്ന സ്‌നേഹയുടെ അമ്മയ്‌ക്ക് തോന്നിയ സംശയമാണ് ഇവരുടെ ജീവൻ തിരിച്ചു കിട്ടാൻ കാരണം. മരുന്നില്ലാതെ സിറിഞ്ചുമായി ഇഞ്ചക്ഷൻ ചെയ്യുന്നത് ശ്രദ്ധയിൽപെട്ട അമ്മ ബഹളം വച്ചതോടെയാണ് നഴ്‌സുമാരും മറ്റ് ആശുപത്രി ജീവനക്കാരും എത്തി അനുഷയെ തടഞ്ഞു വച്ചത്.